Agrowon Podcast: गव्हाचा बाजार स्थिर; लसूण, बेदाणा, कापूस तसेच काय आहेत आजचे सोयाबीन भाव?

Market Bulletin:

सोयाबीनमध्ये नरमाई

आंतरराष्ट्रीय बाजारातही सोयाबीन आणि सोयापेंडच्या भावात चढ उतार सुरु आहेत. आज सोयाबीनचे वायदे दुपारपर्यंत १०.३८ डाॅलर प्रतिबुशेल्सवर होते. तर सोयापेंडचे वायदे कमी होऊन २९६ डाॅलर प्रतिटनांवर होते. देशात सोयाबीनच्या बाजारावरील दबाव कायम आहे. देशात आजही सोयाबीनला ३ हजार ८०० ते ४ हजारांचा भाव मिळाला. तर प्रक्रिया प्लांट्सनी खरेदीचे भाव आजही ४ हजार ३०० ते ४ हजार ३५० रुपयांच्या दरम्यान काढले होते. देशातील खुल्या बाजारातील सोयाबीनची आवक वाढत आहे. सोयाबीनवरील दबाव कायम राहील, असा अंदाज सोयाबीन बाजारातील अभ्यासकांनी व्यक्त केला.

कापसाचे भाव स्थिर

कापसाच्या भावावरील दबाव आजही कायम होता. सीसीआयची खरेदी अनेक भागात ठप्प झाली आहे. याचाही परिणाम खुल्या बाजारात दिसत आहे. तसेच पुढे कापूस आणि सुताला उठाव नसल्याचे उद्योगांकडून सांगण्यात येत आहे. त्याचा परिणाम दरावर दिसून येत आहे. कापसाची आवक सरासरी सव्वा लाख गाठींच्या दरम्यान आहे. खुल्या बाजारात सरासरी भावपातळी ६ हजार ८०० ते ७ हजार २०० रुपयांच्या दरम्यान आहे. वायद्यांमध्ये कापसाच्या भावात काहीसे चढ उतार सुरु आहेत. आंतरराष्ट्रीय बाजारातही भावावरील दबाव कायम आहे. देशातील बाजारात कापसाची आवक आणखी काही आठवडे चांगली राहील, असा अंदाज कापूस बाजारातील अभ्यासकांनी व्यक्त केला.

लसणामध्ये नरमाई

देशातील काही बाजारात लसणाची आवक सुरु झाली. नव्या मालाची आवक दिवसेंदिवस वाढत आहे. लसणाला उठावही चांगला आहे. मात्र वाढत्या आवकेबरोबर भावातही चढ उतार दिसून येत आहेत. लसणाचे भाव मागील काही दिवसांमध्ये क्विंटलमागे आणखी २ ते ३ हजाराने कमी झाले आहेत. सध्या लसणाला प्रतिक्विंटल सरासरी ८ हजार ते १० हजारांच्या दरम्यान भाव मिळत आहे. पुढील काळात लसणाची आवक आणखी वाढण्याचा अंदाज आहे. त्याचा परिणाम दरावर दिसून येईल, असा अंदाज व्यापारी व्यक्त करत आहेत.

गव्हाचा बाजार स्थिरावला

देशातील बाजारात गव्हाच्या भावातील चढ उतार मागील काही दिवसांपासून थांबले आहेत. सरकार खुल्या बाजारात गव्हाची विक्री करत असल्याने दरावर परिणाम दिसत आहे. गव्हाचा भाव देशभरात सरासरी २ हजार ६०० हजार ते २ हजार ८०० रुपयांच्या दरम्यान होता पोचला. हा दर मागील आठवडाभरापासून स्थिर आहे. गव्हाच्या भावात मागील काही दिवसांपासून आलेली नरमाई सध्या थांबली आहे. मात्र बाजारातील गव्हाची आवक वाढल्यानंतर दरावर आणखी दबाव येऊ शकतो. तसेच गव्हाचे भाव हमीभावाच्या दरम्यान येतील, असा अंदाज गहू बाजारातील अभ्यासकांनी दिला.

बेदाणाला दरात सुधारणा

लग्नसराई आणि सण समारंभामुळे बेदाण्याला चांगली मागणी आहे. बेदाणा निर्मितीचा हंगाम सुरू होऊन आता दोन महिने झाले. पण बाजारात बेदाण्याची आवक जेमतेमच आहे. यंदा बेदाणा निर्मितीला द्राक्षटंचाई भासू लागली आहे. त्यामुळे बेदाणा निर्मिती संथगतीने सुरू आह त्यामुळे मागील पंधरा दिवसांत बेदाण्याच्या दरात प्रति किलोस २५ रुपयांची वाढ झाली आहे. नव्या बेदाण्याला प्रति किलोस १०० ते २५० रुपये दर मिळत आहे. त्यातच फेब्रुवारीच्या शेवटच्या आठवड्यात महाशिवरात्र, त्यानंतर रमजान ईद, होळी सण येत आहेत. या सणानिमित्त देशभरातून बेदाण्याला मोठी मागणी असते. त्यामुळे बेदाण्याला मागणी राहून दरही टिकून राहतील, असा अंदाज बेदणा बाजारातील अभ्यासकांनी व्यक्त केला.