Garlic Rate: लसणाचे दर प्रति क्‍विंटल तीन ते १३ हजार रुपयांवर

Nagpur News: हंगामातील नव्या लसणाची आवक होताच बाजारात तेजीत असलेल्या लसूण दरात घसरण नोंदविण्यात आली आहे. नोव्हेंबर महिन्यात लसणाची आवक १००० क्‍विंटलपेक्षा अधिक असताना दर १८ हजार ते ३२ हजार रुपये क्‍विंटलवर पोहोचले होते. आता मात्र आवक १६०० क्‍विंटलवर असताना दर ३००० ते १३ हजार रुपये असे आहेत.

कळमना बाजार समितीत उत्तर प्रदेशसह देशाच्या विविध भागांतून लसूण आवक होते, असे व्यापारी सूत्रांनी सांगितले. नजीकच्या काळात लसणाला चांगला दर मिळत असल्याने विदर्भातही या पिकाखालील क्षेत्र वाढले आहे. त्याच्याच परिणामी हंगामात नव्या लसणाची आवक होताच दर दबावात येतात, अशी स्थिती राहते.

नोव्हेंबर २०२४ मध्ये बाजारात लसणाचे दरात सुधारणा नोंदविली गेली. १६ नोव्हेंबरपूर्वी दर काहीसे दबावात होते. त्यानंतर आवक पूर्वीच्या ४२० क्विंटलवरून थेट ११२० क्‍विंटलवर पोहोचली. त्यानंतर लसणाचे दरातही तेजी येत ते २० हजार ते ३४ हजार रुपये क्‍विंटलवर पोहोचले, असे व्यापारी सांगतात.

आता १५ जानेवारी दरम्यान ५६० क्‍विंटल लसणाची आवक होत आठ हजार ते १८ हजार रुपये क्‍विंटलचा दर मिळाला. त्यानंतर दरात सुधारणा होत ते ८ हजार ते २० हजारांवर पोहोचले. २७ जानेवारीला आवक १६८० क्‍विंटल व दर ३००० ते १३ हजार रुपये असे होते. ३० जानेवारीला दरात पुन्हा घसरण झाली. या वेळी २३८० क्‍विंटलची आवक व दर २००० ते १० हजार रुपये असे होते. सध्या लसणाचे व्यवहार याच दराने होत असल्याचे व्यापाऱ्यांनी सांगितले.

अमरावतीत २५० क्‍विंटल आवक

विदर्भात भाजीपाल्यासाठी अमरावती येथील फळ व भाजीपाला बाजारपेठ नागपूरनंतर दुसऱ्या क्रमांकाची ओळखली जाते. या ठिकाणी देखील हंगामी फळांसह भाजीपाल्याची आवक मोठ्या प्रमाणावर होते. या बाजार समितीत सध्या लसणाची २५० क्‍विंटल इतकी अत्यल्प आवक नोंदविली जात आहे. अमरावतीमध्ये लसणाला ३००० ते ११ हजार रुपयांचा दर मिळत असल्याचे सांगण्यात आले.