Vegetable Market : चाकणच्या बाजारात ढोबळी मिरचीची १० टन आवक

Pune News : येथील महात्मा फुले घाऊक बाजारात रविवारी (ता. १९) पालघर जिल्ह्यातून हिरव्या ढोबळी मिरचीची सुमारे दहा टन आवक झाली. हिरव्या ढोबळी मिरचीला घाऊक बाजारात प्रतिकिलोला ३५ ते ४० रुपये भाव राहिला. तर कांद्याची आवक दोन हजार क्विंटल झाली. कांद्याला घाऊक बाजारात प्रतिकिलोला किमान वीस ते कमाल तीस रुपये भाव मिळाला.

बाजारात इतर भाजीपाल्यामध्ये बुलडाणा, नंदुरबार जिल्ह्यांतून हिरव्या मिरचीची पन्नास टन आवक झाली. हिरव्या मिरचीला घाऊक बाजारात प्रति किलोला ४५ ते ५५ रुपये भाव मिळाला. मध्य प्रदेश राज्यातून हिरव्या वाटाण्याची सुमारे पन्नास टन आवक झाली.

हिरव्या वाटाण्याला घाऊक बाजारात ३५ ते ४० रुपये प्रति किलोला भाव मिळाला. टोमॅटोची आवक तीस टन झाली. टोमॅटोला घाऊक बाजारात प्रतिकिलोला भाव पाच ते १२ रुपये मिळाला, अशी माहिती खेड कृषी उत्पन्न बाजार समितीचे सभापती विजय शिंदे, सचिव बाळासाहेब धंद्रे यांनी दिली.

लसणाची आवक फक्त २५ क्विंटल झाली. घाऊक बाजारात लसूण दीडशे रुपये ते अडीचशे रुपये दर होते. बटाट्याची आवक तीन हजार क्विंटल झाली. बटाट्याला प्रतिकिलोला सुमारे बारा ते वीस रुपये भाव मिळाला.

बाजारात इंदूर, आग्रा येथून बटाट्याची आवक होत आहे तसेच स्थानिक काढणी केलेल्या नवीन बटाट्याची आवक होत आहे. बटाट्याला मोठी मागणी आहे. किरकोळ बाजारात बटाटा प्रतिकिलोला तीस ते चाळीस रुपये भावाने विकला जात आहे. कोथिंबिरीची आवक वाढली होती. तर मेथीच्या जुड्यांचे भाव वाढले होते.

कोथिंबीर, मेथी पन्नास हजार जुड्यांची आवक

बाजारात कोथिंबीर, मेथीच्या सुमारे पन्नास हजार जुड्यांची तर पालकच्या सुमारे ३ हजार जुड्यांची आवक झाली होती. या वेळी मेथीला एक जुडीला १० ते १४, कोथिंबिरीला दोन ते पाच रुपये, तर शेपूची पाच ते सात रुपये, तर पालक तीन ते सहा रुपये दर होते.