Lumpy Skin : केंद्राच्या पथकाकडून जनावरांची पाहणी

बुलडाणा ः राज्यात सर्वाधिक जनावरांचा ‘लम्पी स्कीन’मुळे (Lumpy Skin) मृत्यू बुलडाणा जिल्‍ह्यात झाले आहेत. या बाबीची दखल घेत राज्याच्या दौऱ्यावर आलेल्या केंद्राच्या पथकाने जिल्ह्यातील मलकापूर तालुक्यात कुंड खुर्द येथे भेट देऊन जनावरांची पाहणी (Livestock Inspection) केली.

लम्पी स्कीन आजारचा प्रादुर्भाव झाल्याच्या पार्श्‍वभूमीवर केंद्र सरकारच्या समितीने राज्यात काही जिल्ह्यांचा दौरा केला. मलकापूर तालुक्यात भेट देऊन पाहणी केलेल्या समितीत दिल्ली येथील पशुसंवर्धन विभाग, कृषी भवन येथील विभागीय अधिकारी डॉ. विजयकुमार, शास्त्रज्ञ डॉ. मंजुनाथ रेड्डी (बंगळूर), सहायक पशुसंवर्धन आयुक्त डॉ. सुनील लहाने (पुणे) आदी उपस्थित होते.

कुंड खुर्द येथील ग्रामपंचायतीमध्ये समितीने पशुपालकांशी संवाद साधला. बाधित व उपचाराने बरे झालेल्या जनावरांची पाहणी केली. तसेच पशुसंवर्धन विभागाच्या क्षेत्रीय अधिकाऱ्यांसोबतही चर्चा करीत उपाययोजनांबाबत समाधान व्यक्त केले.

या वेळी जिल्हा पशुसंवर्धन उपायुक्त डॉ. प्रवीणकुमार घुले, जिल्हा पशुसंवर्धन अधिकारी डॉ. अशोक लोणे आदी उपस्थित होते. केंद्राच्या अधिकाऱ्यांनी लम्पी स्कीनबाधित भागात पाहणी करून चर्चा केली. या अनुषंगाने ही समिती नेमके काय निष्कर्ष काढते, अहवालात कुठल्या बाबींचा समावेश केला जातो, याकडे लक्ष लागले आहे.