Yavatmal News : येथून आठ किलोमीटर अंतरावर असलेल्या टाकळी (बु.) येथील मयुरी उमेश इंगोले हिने पहिल्याच प्रयत्नात नीटमध्ये ५२७ गुण मिळवित डॉक्टर बनण्याच्या स्वप्नाकडे झेप घेतली आहे.

मयूरीचे वडील उमेश इंगोले अल्पभूधारक शेतकरी असून आई अश्‍विनी टाकळी जिल्हा परिषद शाळेत पोषण आहार स्वयंपाक करते. अतिशय बिकट परिस्थितीतून तिने हे यश मिळविले आहे. इतरांसाठी ती प्रेरणादायी ठरत आहे.

घरची आर्थिक स्थिती जेमतेम, स्वयंपाकी व थोडी जमीन यामधून मिळणाऱ्या थोड्याथोडक्या उत्पन्नावर कुटुंबाचा उदरनिर्वाह. मात्र गरिबीचे भांडवल न करता त्यांनी इतरांच्या शेतातही मजुरीचे काम पत्करून अभ्यासात हुशार मयूरीला डॉक्टर बनविण्याचे स्वप्न उराशी बाळगले. मुलीला उच्च शिक्षण दिले. त्याचे तिने चीज केले आहे.

विशेष म्हणजे मयूरीचे जिल्हा परिषद शाळेत प्राथमिक तर येथील जिजामाता हायस्कूल येथे माध्यमिक शिक्षण झाले. पुढे नांदेड येथे ७५ टक्के स्कॉलरशिपवर तिची नीट क्लासेसमधे निवड झाली.

केवळ जिद्द, योग्य मार्गदर्शन आणि मेहनत या जोरावर मयूरीने त ५२७ गुण मिळविले. मयूरीच्या यशात आईवडील, प्राथमिक शिक्षक विजय काळे, माध्यमिक शिक्षिका पंकजा काळे यांच्यासह अनेकांचा हातभार असून तिच्या या यशाबद्दल तिचे कौतुक होत आहे.

मयूरीचा झाला पहिला सत्कार

मयूरीच्या प्रेरणादायी यशाची कहाणी ऐकून तिचे प्राथमिक शिक्षक विजय काळे, क्रीडा शिक्षक श्याम पांडे, समाजसेवक ओंकार निमकर आदी नुकतेच मयुरीच्या घरी पोहोचले. त्यांनी मयुरीचे कौतुक करीत पुष्पगुच्छ देत तिचा सत्कार केला. गरीबी असतानाही आपल्या मुलीने संपादित केलेले यश, त्यातूनच लेकीचा झालेला पहिला सत्कार पाहून मयूरीचे आई, वडील भावूक झाले.