Pune News : राज्याच्या कमाल आणि किमान तापमानात चढ-उतार सुरूच आहेत. पहाटेच्या वेळी किमान तापमानात घट होत असल्याने थंडीची चाहूल लागली आहे. तर दुपारच्या वेळी उन्हाचा चटका कायम असल्याचे चित्र दिसून येत आहे. निफाड येथील गहू संशोधन केंद्र, धुळे येथील कृषी महाविद्यालयात किमान तापमानाचा पारा १५ अंशांच्या खाली घसरला आहे. तर सांताक्रुझ येथे उच्चांकी ३६.२ अंश तापमानाची नोंद होत आहे.

मध्य बंगालच्या उपसागरात चक्राकार वाऱ्यांची स्थिती कायम आहे. ढगाळ हवामान निवळताच स्वच्छ सूर्यप्रकाश जमिनीवर येत असल्याने विदर्भ आणि कोकणात उन्हाची ताप अधिक आहे. तर कोकण वगळता उर्वरित राज्यात किमान तापमानाचा पारा २० अंशांच्या खाली येऊ लागला आहे. उत्तर महाराष्ट्र आणि मराठवाड्यात कमाल-किमान तापमानातील तफावत वाढली आहे.

बुधवारी (ता. ६) सकाळपर्यंतच्या २४ तासांमध्ये सांताक्रूझसह डहाणू, अकोला, रत्नागिरी येथे कमाल तापमान ३५ अंशांच्या पुढे आहे. तसेच धुळे येथील कृषी महाविद्यालयात १४.४ अंश सेल्सिअस किमान तापमानाची नोंद झाली आहे. तर निफाड येथील गहु संशोधन केंद्रात १४.८ अंश सेल्सिअस तापमान नोंदले गेले आहे. जळगाव, नाशिक, महाबळेश्वर येथे किमान तापमान १६ अंश व त्यापेक्षा खाली आले आहे. आज (ता. ७) तापमानातील चढ-उतार कायम राहण्याची शक्यता हवामान विभागाने वर्तविली आहे.

बुधवारी (ता. ६) सकाळी ८.३० वाजेपर्यंतच्या २४ तासांमध्ये नोंदले गेलेले कमाल आणि किमान तापमान (कंसात) तापमान (अंश सेल्सिअस मध्ये) :

पुणे ३१.७ (१७.०), अहिल्यानगर ३१.९ (१६.३), धुळे ३३ (१४.४) जळगाव (१६.०), कोल्हापूर ३०.५ (२०.३), महाबळेश्वर २५.३ (१५.६), मालेगाव (१७.२), नाशिक ३२.३ (१६.०), निफाड ३१.८ (१४.८), सांगली (१९.०), सातारा ३१.६ (१७.५), सोलापूर ३४.८ (२१.९), सांताक्रूझ ३६.२ (२२.३), डहाणू ३५.५ (२२.०), रत्नागिरी ३५.२ (२२.६), छत्रपती संभाजीनगर ३३.२ (१८.१), नांदेड (१८.८), धाराशिव ३१.० (१८.४), परभणी (१८.८), अकोला ३५.५ (१९.६), अमरावती ३४.८ (१९.३), भंडारा ३३.० (१८.१), बुलडाणा ३१.६ (१८.५), ब्रह्मपुरी ३४.३ (१८.९), चंद्रपूर ३३.८ (१८.८), गडचिरोली ३३.४ (१८.८), गोंदिया ३२.८ (१७.५), नागपूर ३३.५ (१८.९), वर्धा ३३.९ (२०.०), वाशीम ३४.६, यवतमाळ ३३.५ (१८.५).

३५ अंशापेक्षा अधिक तापमान असलेली ठिकाणे : सांताक्रूझ ३६.२, डहाणू ३५.५, अकोला ३५.५, रत्नागिरी ३५.२.