Pune News: मागील आठवडाभर राज्यातील बहुतांशी भागात पावसाची उघडीप राहीली. तर काही ठिकाणी ढगाळ हवामानासह हलक्या पावसाने हजेरी लावली. मात्र जोरदार सर्वदूर पाऊस झाला नाही. आता मात्र राज्यातील काही भागात पावसाची सुरुवात होऊ शकते, असा अंदाज हवामान विभागाचे निवृत्त शास्त्रज्ञ माणिकराव खुळे यांनी व्यक्त केला. 

हवामान विभागाने ऑगस्ट महिन्यातील पहिल्या दोन आठवड्यात पावसाचे प्रमाण कमीच राहण्याची शक्यता वर्तविली होती. पहिल्या आठवड्यात राज्यात पाऊस कमीच राहीला.  आता काही भागात पावसाला सुरु होईल, असा अंदाज श्री. खुळे यांनी दिला.

“८ ऑगस्टपासून विदर्भ आणि कोकणात पावसाचा अंदाज आहे. दुसरा आठवडा म्हणजेच ८ ऑगस्ट ते १५ ऑगस्ट दरम्यान विदर्भ आणि कोकणात मध्यम ते जोरदार पावासाचा अंदाज आहे. तर मध्य महाराष्ट्रात ८ आणि ९ ऑगस्ट रोजी पावसाचा अंदाज आहे,” असेही श्री. खुळे म्हणाले.

विशेषतः कोकणातील रायगड, रत्नागिरी आणि सिंधुदूर्ग जिल्ह्यात पुढील आठवडाभर पावसाचा अंदाज आहे. विदर्भातील वर्धा, नागपूर, भंडारा, गोंदीया, चंद्रपूर, गडचिरोली आणि यवतमाळ जिल्ह्यात पुढील आठवड्यात पावसाची शक्यता आहे.  तर मध्य महाराष्ट्रातली पुणे, अहिल्यानगर सातारा, सांगली, कोल्हापूर आणि सोलापूर जिल्ह्यातही मध्यम ते जोरदार पावसाची शक्यता असल्याचे खुळे यांनी स्पष्ट केले. 

मराठवड्यातही शुक्रवारपर्यंत पावसाचा अंदाज आहे. गुरुवारी आणि शुक्रवारी काही भागात मध्यम ते जोरदार पावसाचा अंदाज आहे. विशेषतः मराठवाड्यातील बीड, धाराशिव, लातूर, परभणी, नांदेड, हिंगोली जिल्ह्यात काही ठिकाणी मध्यम ते जोरदार पावसाचा अंदाज आहे.

राज्यातील तापमानातही वाढ दिसून येत आहे. विदर्भ ११ जिल्हे, जळगाव, छत्रपती संभाजीनगर, नाशिक  आणि पुणे जिल्ह्यातील पूर्व भाग अश्या १५ जिल्ह्यात दुपारच्या कमाल तापमानात सरासरीपेक्षा ३ ते ४ डिग्रीने वाढ झाली आहे. तापमान ३२ ते ३३ अंशाच्या दरम्यान जाणवत आहे, असेही श्री. खुळे यांनी स्पष्ट केले.