Monsoon Rain: मराठवाड्यात २ दिवस पावसाचा अंदाज; मध्य महाराष्ट्र, कोकणातही काही ठिकाणी मध्यम पावसाची शक्यता

Pune News: राज्यातील अनेक भागात पावसाची ३ दिवसांपासून उघडीप आहे. तर मराठवाडा आणि विदर्भातील अनेक ठिकाणी गेले आठवडाभर पावसाने दडी मारली आहे. राज्यातील काही भागात पुढील ५ दिवस विजा तसेच मेघगर्जनेसह हलक्या ते मध्यम पावसाचा येलो अलर्ट देण्यात आला. 

हवामान विभागाने आज विदर्भातील बुलडाणा, वाशीम, यवतमाळ, वर्धा, नागपूर, भंडारा, गोंदीया, चंद्रपूर आणि गडचिरोली तसेच मराठवाड्यातील बीड, धाराशिव, लातूर, नांदेड, परभणी, हिंगोली तर मध्य महाराष्ट्रातील पुणे, अहिल्यानगर, सातारा, सांगली, कोल्हापूर आणि सोलापूर तसेच कोकणातील सिंधुदूर्ग, रत्नागिरी आणि रायगड जिल्ह्यात काही ठिकाणी विजा आणि मेघगर्जनेसह हलक्या ते मध्यम पावसाचा येलो अलर्ट देण्यात आला. तर राज्यातील इतर भागातही ढगाळ हवामानासह हलक्या सरी पडतील, अशीही शक्यता हवामान विभागाने वर्तविली. 

गुरुवारी आणि शुक्रवारी कोकणातील सिंधुदूर्ग, रत्नागिरी, रायगड तर मध्य महाराष्ट्रातील पुणे, अहिल्यानगर, सातारा, सांगली, सोलापूर, कोल्हापूर तसेच मराठवाड्यातील बीड, लातूर, धाराशिव, नांदेड, परभणी, जालना, छत्रपती संभाजीनगर आणि हिंगोली जिल्ह्यात काही ठिकाणी विजा आणि मेघगर्जनेसह हलक्या ते मध्यम पावसाचा येलो अलर्ट देण्यात आला. विदर्भातील यवतमाळ, वर्धा, गडचिरोली, चंद्रपूर, भंडारा आणि गोंदीया जिल्ह्यात काही ठिकाणी विजा तसेच मेघगर्जनेसह हलक्या पावासचा अंदाज देण्यात आला. 

शनिवारी राज्यात पावसाची तीव्रता आणखी कमी होऊन कोल्हापूर, सांगली, धाराशिव, लातूर, नांदेड, चंद्रपूर आणि गडचिरोली जिल्ह्यात काही ठिकाणी पावसाचा अंदाज देण्यात आला. तर रविवारी विदर्भातील सर्वच जिल्ह्यांमध्ये विजा आणि मेघगर्जनेसह काही ठिकाणी हलक्या ते मध्यम पावसाचा अंदाज देण्यात आला.