Maharashtra Monsoon Update : बंगालच्या उपसागरातील संभाव्य कमी दाबाचे क्षेत्र, दक्षिणेकडे आलेला मॉन्सूनचा पूर्व भाग पोषक ठरल्याने राज्यात पावसाचे पुनरागमन होण्याची शक्यता आहे. आज (ता. १८) विदर्भ, मराठवाड्यात विजांसह पावसाचा इशारा देण्यात आला आहे. विदर्भात जोरदार पावसाची शक्यता आहे. उर्वरित राज्यात हलक्या ते मध्यम पावसाचा अंदाज हवामान विभागाने वर्तविला आहे.

मॉन्सूनचा आस असलेल्या कमी दाबाच्या पट्ट्याचे पश्‍चिम टोक हिमालयाच्या पायथ्याकडे कायम आहे. पूर्व टोक त्याच्या सर्वसाधारण स्थितीच्या दक्षिणेकडे आले आहे. पूर्व टोक पुढील चार ते पाच दिवस दक्षिणेकडे राहण्याची शक्यता आहे. मॉन्सूनचा आस बारबांकी, देहरी, रांची, दिघा ते वायव्य बंगालच्या उपसागरापर्यंत सक्रिय आहे.

मॉन्सून सक्रिय होऊन पावसाचे पुनरागमन होण्याचे संकेत आहेत. राज्यात ढगाळ हवामान होत असून, उकाडा जाणवत आहे. आज (ता. १८) विदर्भ, मराठवाड्यात विजांसह पावसाचा इशारा देण्यात आला आहे. विदर्भातील काही जिल्ह्यांत जोरदार पावसाच्या सरी कोसळण्याची शक्यता आहे. कोकणात तुरळक ठिकाणी जोरदार, तर उर्वरित राज्यात विजांसह हलक्या पावसाची शक्यता आहे.

कमी दाब क्षेत्राची होतेय निर्मिती

बंगालच्या उपसागराच्या वायव्य भागात समुद्र सपाटीपासून ७.६ किलोमीटर उंचीवर चक्राकार वारे वाहत आहेत. या वाऱ्याच्या प्रभावामुळे आज (ता. १८) कमी दाबाचे क्षेत्र तयार होत आहे. या प्रणालीच्या प्रभावामुळे बंगालच्या उपसागर, पूर्व भारतातील राज्यांत ढगांची दाटी झाली आहे.