Pune News : मराठवाडा आणि विदर्भातील काही भागात मागील पाच दिवसांपासून पाऊस हजेरी लावत आहे. तर काही ठिकाणी गारपीटही झाली. हवामान विभागाने आजही विदर्भातील काही भागात पावसाचा येलो अलर्ट दिला. 

हवामान विभागाने आज विदर्भातील सहा जिल्ह्यांमध्ये काही ठिकाणी पावसाचा अंदाज दिला. भंडारा, चंद्रपूर, गडचिरोली, गोंदीया, नागपूर, यवतमाळ या जिल्ह्यांमध्या काही भागात विजा आणि ढगांच्या गडगडाटासह हलक्या ते मध्यम पावसाचा अंदाज व्यक्त केला.

या भागांना येलो अलर्ट देण्यात आला. तर यावेळी या भागात ३० ते ४० किलोमीटर प्रतितास वेगाने वारे वाहतील, असा अंदाज देण्यात आला. 

तसेच या जिल्ह्यांमधील इतर भागात ढगाळ वातावरण राहील, असाही अंदाज देण्यात आला. तर राज्याच्या इतर जिल्ह्यांमध्ये हवामान कोरडे राहतील, असा अंदाज आहे. तर राज्यातील कमाल तापमानात पुन्हा चांगलीच वाढ झाली.

बहुतांशी भागांमध्ये कमाल तापमान ३५ अंश सेल्सिअसपेक्षा जास्त दिसते. राज्यातील कमाल आणि किमान तापमानात पुढील काही दिवसांमध्ये पुन्हा वाढ दिसेल, असाही अंदाज हवामान विभागाने दिला.