Pune News : मध्य भारतातील कमी दाब क्षेत्राने बाष्प खेचून नेल्याने राज्याच्या अनेक भागात पावसाने उघडीप दिली आहे. पुढील तीन ते चार दिवस पाऊस विश्रांती घेणार असून, सोमवारपासून (ता. १६) विदर्भात पुन्हा पावसाला पोषक हवामान होण्याची शक्यता आहे. आज (ता. १३) राज्यात मुख्यतः उघडिपीसह हलक्या पावसाची शक्यता हवामान विभागाने वर्तविली आहे.

वायव्य मध्य प्रदेश आणि परिसरावर तीव्र कमी दाबाच्या क्षेत्र (डिप्रेशन) कायम आहे. ही प्रणाली उत्तर प्रदेशातील आग्र्यापासून ५० किलोमीटर पूर्वेकडे, अलिगडपासून ११० किलोमीटर दक्षिणेकडे, तर मध्य प्रदेशातील ग्वालियरपासून ९० किलोमीटर उत्तरेकडे होती. उत्तरेकडे सरकत असलेली ही प्रणाली आज (ता. १३) ओसरण्याची शक्यता आहे.

मॉन्सूनचा आस असलेला कमी दाबाचा पट्टा पंजाबच्या अमृतसरपासून दिल्ली तीव्र कमी दाबाचे केंद्र (डिप्रेशन), चुर्क, देहरी, पुरुलिया, कॅनिंग ते ईशान्य बंगालच्या उपसागरापर्यंत कायम आहे. दक्षिण गुजरात ते कर्नाटकपर्यंत किनारपट्टीला समांतर हवेचा कमी दाबाचा पट्टा सक्रिय आहे.

पावसाने उघडिपीनंतर ढगाळ हवामानामुळे कमाल तापमानात चढ-उतार होत आहे. गुरुवारी (ता. १२) सकाळपर्यंतच्या २४ तासांमध्ये चंद्रपूर येथे राज्यातील उच्चांकी ३२.४ अंश सेल्सिअस तापमानाची नोंद झाली.

अनेक ठिकाणी कमाल तापमानाचा पारा ४० अंशांच्या पुढे सरकला आहे. राज्यात तुरळक ठिकाणी हलक्या ते मध्यम पावसाने हजेरी लावली आहे. आज (ता. १३) राज्यात पावसाची उघडीप शक्य असून, तुरळक ठिकाणी हलक्या पावसाचा अंदाज हवामान विभागाने वर्तविली आहे.