अमळनेर, जि. जळगाव : अमळनेर तालुक्यातील तापी नदीवरील (Tapi River) पाडळसे सिंचन प्रकल्पाची (Padalse Irrigation Project) सुरुवातीची किंमत अवघी १४२ कोटी होती. यानंतर सप्टेंबर २००९ मध्ये ११२७ कोटींच्या प्रकल्प खर्चाला मान्यता देण्यात आली.

त्यानंतर प्रकल्प खर्चाला मान्यताच मिळाली नसून आठवडाभरापूर्वीच ‘मेरी’कडे सुधारित ४ हजार ८९० कोटींचा चतुर्थ प्रशासकीय मान्यता प्रस्ताव तापी पाटबंधारे विकास महामंडळ, (Dam Development Corporation) जळगाव कार्यालयाने सादर केला आहे.

प्रशासकीय मान्यता मिळावी म्हणून तापी महामंडळासह आमदार व खासदारांनी जाणीवपूर्वक प्रयत्न करणे आवश्यक आहे. प्रकल्प खर्चाला २००९ पासून मान्यताच नाही. यात शासनाचा हलगर्जीपणा होता, तापी विकास महामंडळासह आमदार व खासदारांचे दुर्लक्ष होते.

मान्यता मागितलीच नाही की दिलीच नाही, हा संशोधनाचा विषय आहे. १४ वर्षांपासून प्रकल्पासाठीच्या प्रस्तावित खर्चापेक्षा कमी निधी मिळत आहे.

बांधकाम साहित्याच्या किमतींसह प्रत्येक गोष्टींच्या दरवाढीमुळे खर्च वाढला आहे. हा वाढीव खर्च आणि जुनी खर्च मान्यता यामुळे निधी तोकडा मिळत असेल, असे मानल्यास जबाबदार सर्वच घटकांनी सुधारित प्रशासकीय मान्यता मिळावी म्हणून सर्वसमावेश प्रयत्न करणे गरजेचे आहे.

पंचवीस टक्के क्षेत्राचाच कायापालट

पाडळसे प्रकल्पामुळे प्रत्यक्षात अमळनेर तालुक्यातील २५ टक्के शेती क्षेत्र सिंचनाखाली येणार आहे. तालुक्याचे एकूण क्षेत्रफळ ७८ हजार हेक्टर असून, प्रकल्पामुळे २२ हजार हेक्टर ओलिताखाली येणार आहे. त्यामुळे इतर लहानसहान सिंचन प्रकल्पांसाठीही प्रयत्न होणे आवश्यक आहे.