Nagpur News : डाळवर्गीय शेतीमालाचे दर नियंत्रणात ठेवण्याच्या उद्देशाने देशांतर्गत वाटाणा आयातीवर भर देण्यात आला आहे. त्यानुसार एप्रिल ते ऑक्टोंबर या कालावधीत सुमारे १२.५४ लाख टन आयात भारतात झाल्याचा दावा केला जात आहे. त्याचा तुरीसह इतर डाळवर्गीय शेतीमालाच्या दरावर परिणाम होणार असल्याचे सांगितले जात आहे.

निर्यात क्षेत्रातील सूत्रांनी दिलेल्या माहितीनुसार, एप्रिल ते जुलैपर्यंत ९.३२ लाख टन, ऑगस्टमध्ये ४३,२४०, सप्टेंबर २७,७३२, ऑक्टोबरमध्ये २.५ लाख टन या प्रमाणे आतापर्यंत सुमारे १२.५४ लाख टन वाटाणा आयात भारतात झाल्याचा अंदाज वर्तविला जात आहे. सूत्रांच्या मते, एप्रिल ते ऑक्टोबरपर्यंत १२.५४ लाख तर डिसेंबर २०२३ ते ऑक्टोबर २०२४ या कालावधीत २४.२३ लाख टन वाटाणा भारतीय बंदरावर पोहोचला.

यंदा ऑगस्टपासून सुरू झालेल्या हंगामात सप्टेंबरपर्यंत कॅनडातून भारतात सुमारे ३.८७ लाख वाटाण्याची आयात करण्यात आली आहे. त्याचवेळी कॅनडातून चीनमध्ये सुमारे २.२ लाख टन आयात केली गेली.

भारतात वाटाण्याची मोठ्या प्रमाणावर आयात होत असल्याने तूर तसेच अन्य डाळवर्गीय शेतीमालाच्या मागणीत घट झाल्याचा दावा केला जात आहे. त्याचा थेट परिणाम हंगामात आवक होणाऱ्या भारतीय शेतीमालाच्या दरावर पडेल, असेही सांगितले जात आहे.

शेतीमाल विपणन क्षेत्राचे अभ्यासक विजय जावांधिया यांनी तूर डाळीचे दर २०० रुपयांच्या पुढे गेल्यास महागाई वाढल्याची ओरड होते. अशा स्थितीत सरकारने तूर डाळीचे दर १३० ते १४० रुपयांपर्यंत नियंत्रित ठेवावेत. त्या माध्यमातून तूर उत्पादक शेतकऱ्यांना ९००० रुपयांपर्यंतचा दर देणे शक्य होणार आहे. हाच पर्याय देशांतर्गत डाळवर्गीय एकमालाचे उत्पादन वाढविण्यासाठी पूरक ठरणार आहे, असे सांगितले.