Cotton Market : ‘सीसीआय’ केंद्रावर मुहूर्ताला १४ क्‍विंटल आवक

Chandrapur News : भद्रावती तालुक्‍यातील नंदोरी (टाकळी) येथील मे. आदिती कॉटन इंडस्ट्रीज येथे सीसीआय अंतर्गत आधारभूत दराने कापूस खरेदीला सुरुवात करण्यात आली. मुहूर्ताच्या एफएक्यू दर्जाच्या कापसाला ७५२१ रुपये दर या वेळी मिळाला.

आधारभूत दराने खरेदीच्या प्रारंभप्रसंगी बाजार समितीचे सभापती भास्कर लटारी ताजणे उपस्थित होते. त्यांच्या हस्ते काटा पूजन करून तसेच विक्रीसाठी कापूस आणणाऱ्या शेतकऱ्याचा शाल-टोपी तसेच नारळ देत सन्मान करण्यात आला. पहिल्या दिवशी सुमारे १४ क्‍विंटल कापसाची खरेदी करण्यात आली. एफएक्यू दर्जाचा या कापसाला ७५२१ रुपयांचा आधारभूत दर देण्यात आला.

या वेळी बाजार समिती संचालक राजेंद्र डांगे, प्रवीण बांदूरकर, गजानन उताणे, शरद जांभूळकर, श्‍यामदेव कापटे, माजी संचालक अजित फाळके, बाजार समिती सचिव नागेश पुनवटकर यांच्यासह सीसीआय भद्रावतीचे केंद्र प्रमुख निळकंठ अकोटकर, आदिती कॉटन इंडस्ट्रीजचे संचालक अविश बाहे, शेतकरी विश्‍वास कोंगरे, संतोष मांडेकर यांची उपस्थिती होती.

मुहूर्ताला कापूस विक्रीसाठी आणणाऱ्या सन्मानार्थी शेतकऱ्यांमध्ये मोरकांत हरिदास लेडांगे यांचा समावेश होता. बाजार समितीचे कर्मचारी संजय शेंडे, विलास पालकर, रोहित शेडामे, मापारी अरुण पाठक यांचीही या वेळी उपस्थिती होती.

‘शेतीमाल विक्रीसाठी आणा’

चंद्रपूर जिल्ह्यातील शेतकऱ्यांनी आपला कापूस भद्रावती तालुक्‍यातील नंदोरी उपबाजारात विक्रीसाठी आणावा, असे आवाहन बाजार समिती प्रशासनाकडून करण्यात आले आहे. सीसीआय केंद्रावर कापूस विक्रीसाठी आधी नोंदणी करावी लागते.

त्याकरिता आधारकार्ड, अद्ययावत पीकपेरा असलेला सात-बारा, बॅंक पासबुक अशा दस्तऐवजांची गरज भासते. त्यानुसार नोंदणी प्रक्रिया पूर्ण करावी, असेही सांगण्यात आले.