Pune News : शिवरात्रीच्या उपवासानिमित्त पुणे बाजार समितीमध्ये रविवार (ता. २३)पासून कवठे आणि रताळ्याची आवक सुरू झाली आहे. कवठांची प्रामुख्याने आवक ही बारामती, जेजुरी, मोरगाव, छत्रपती संभाजीनगर, अहिल्यानगर, पारनेर आदी भागांमधून झाली होती.

तर रताळ्याची आवक कराड, बेळगाव, कोल्हापूर भागांतून झाली होती. या वेळी कवठाला शेकड्याला ४०० ते ८०० रुपये दर रताळ्याला दहा किलोला २५० ते ४०० रुपये दर होता. या वर्षी शिवरात्र बुधवारी (ता. २६) साजरी होत आहे. यानिमित्ताने कवठांची आवक सुरू झाली आहे.

कवठांच्या आवकेबाबत शक्तिवान जगताप आणि तुकाराम जगताप (रा. कोथळे, ता. पुरंदर) यांनी माहिती दिली. शक्तिवान आणि तुकाराम हे गेल्या २० वर्षांपासून जेजुरी, मोरगाव, बेलसर, खळद परिसरातून कवठांची खरेदी करून पुणे बाजार समितीमध्ये विक्रीसाठी आणतात.

कवठांची माहिती देताना जगताप म्हणाले, ‘‘आमचे वडील ४० वर्षांपासून कवठांची खरेदी करून बाजार समितीमध्ये विक्री करतात. रविवारी (ता. २३) आम्ही ४० पोती कवठे विक्रीसाठी आणली होती.

दिवसेंदिवस कवठांची झाडे कमी होत असून, उत्पादन घटले आहे. आमचे वडील १०० गोणी विक्रीसाठी आणत होते. आता केवळ ४० गोणी आणल्या आहेत. या वेळी आकारानुसार ४०० ते ८०० रुपये शेकड्याला मिळाले.’’

रताळ्याच्या आवकेची माहिती प्रमुख अडतदार अमोल घुले यांनी दिली. घुले म्हणाले, ‘‘महाशिवरात्री निमित्त कराड, पंढरपूर, बेळगाव परिसरांतून सुमारे अडीच हजार गोणी आवक झाली होती. या वेळी कराडच्या रताळ्यांना दहा किलोला ३५० ते ४००, तर पंढरपूर रताळ्यांना २०० ते २५० रुपये दर होता.’’