Nashik News : चालूवर्षी उन्हाळ कांदा हंगाम शेतकऱ्यांसाठी अस्मानी व सुलतानी अशा दोन्ही संकटांनी अडचणीत आणणारा ठरला आहे. वातावरणीय बदलांमुळे साठवणूक क्षमतेवर परिणाम झाला. परिणामी कांद्याची वाढलेली सड आणि फुटलेल्या कोंबामुळे आता प्रतवारी धोक्यात आली आहे. त्यामुळे कांदा उपलब्धतेचा प्रश्न निर्माण होणार आहे.
गत रब्बी हंगामात नाशिक जिल्ह्यात २ लाख २० हजार ८६४ हेक्टर क्षेत्रावर उन्हाळ कांदा लागवडी झाल्या होत्या. मात्र वाढीच्या अवस्थेत कांद्यावर करपा या बुरशीजन्य रोगाचा तर किडीमध्ये फुलकिडीचा प्रादुर्भाव वाढला. परिणामी पीक संरक्षण खर्च वाढला.
('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)
त्यातच काढणीकाळात वादळी वाऱ्यांसह पाऊस व गारपिटीमुळे ३५ हजार हेक्टर क्षेत्र बाधित झाले. यात सटाणा, कळवण, मालेगाव, चांदवड, येवला, सिन्नर, नांदगाव, देवळा व निफाड तालुक्यांत नुकसान अधिक होते. त्यामुळे अनेक शेतकऱ्यांचा कांदा साठवणूक होण्यापूर्वीच सडला.
तापमान वाढीमुळे चाळीत साठविलेला जवळपास ४० टक्के कांदा सडला. आता थोड्या शेतकऱ्यांकडे कांदा शिल्लक आहे. प्रत्यक्षात साठवणूकपश्चात ५० टक्के नुकसान असल्याने शेतकऱ्यांच्या पदरी काहीच पडलेले नाही. एप्रिल ते ऑगस्ट दरम्यान शेतकऱ्यांचा कांदा विक्रीतून उत्पादन खर्चही वसूल झालेला नाही.
ऑगस्टमध्ये दरात सुधारणा होत असतानाच केंद्र सरकारने ४० टक्के निर्यातशुल्क लागू करून कांदा बाजारावर नियंत्रण आणल्याने शेतकरी अडचणीत आले. त्यानंतर १३ दिवस बाजार बंद राहिल्याने कांदा विक्रीशिवाय तुंबल्याने सड वाढली.
त्यामुळे शेतकऱ्यांकडे जो थोडा कांदा शिल्लक आहे, त्यात वजनातील घट व सडून झालेले नुकसान बघता एकूण उत्पादनाच्या ३० ते ४० टक्के मालाची विक्री होऊ शकेल, असे शेतकरी घनश्याम पवार यांनी सांगितले.
काढणीपश्चात साठवणूक वयोमान संपुष्टात
काढणीपश्चात कांद्याचे साठवणूक वयोमान संपुष्टात आले आहे. त्यामुळे काही ठिकाणी कांद्याची सड व कोंब येण्याचे प्रमाण अधिक आहे. त्यामुळे शेतकऱ्यांनी टप्प्याटप्याने कांदा विक्री करणे फायद्याचे ठरेल. काही शेतकऱ्यांचा कांदा चांगला असल्यास, त्यांनी विक्रीचा निर्णय घ्यावा, असा सल्ला ज्येष्ठ कांदा पीक शास्त्रज्ञ डॉ. सतीश भोंडे यांनी दिला.
साठवलेल्या कांद्याची सध्यस्थिती :
- पाऊस व गारपिटीमुळे टिकवण क्षमतेवर परिणाम
- साठवून ६ महिने झाल्याने वेगाने सड
- वातावरणीय बदलांमुळे आर्द्रता वाढल्याने फुटले कोंब
- साठवणूक पश्चात दोनदा ते तीनदा हाताळणी करणाऱ्या शेतकऱ्यांचे कमी नुकसान
- बाजार भावात सुधारणा; पण शेतकऱ्यांकडे अत्यल्प कांदा
- सरासरी दराचा लाभ कमीच
यावर्षी काढणी दरम्यान पाऊस झाल्याने बराचसा कांदा शेतामध्ये सडून गेला. उर्वरित मालसुद्धा चाळीत खराब झाला. राहिलेला माल खाद म्हणून विकावा लागला. कळवण तालुक्यात बऱ्यापैकी माल संपत आला आहे.- पंडित वाघ, कांदा उत्पादक, बार्डे, ता. कळवण
सहा महिने झाले, दोन दोन वेळेस कांदे पलटी मारून ठेवले. तरीही कांदा टिकण्यासारखा नव्हता. कांदा चाळीत खराब झाला. थोडा शिल्लक आहे. आत्ता फक्त व्यापाऱ्यांकडे कांदा आहे.- कौतिक जाधव, शेतकरी, दरेगाव, ता. चांदवड.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.