Amravati News : हमीदराने शासकीय खरेदीस मुदतवाढ दिली असली तरी नोंदणीकृत शेतकऱ्यांनाच त्याचा लाभ मिळणार आहे. उर्वरित शेतकऱ्यांना खासगी बाजारातच पडत्या दराने विक्री करण्याची वेळ आली असून मुदतवाढीनंतरही या बाजारातील दर वधारू शकले नाहीत. सोमवारी (ता. २०) स्थानिक बाजार समितीत सरासरी ४१०० रुपये प्रति क्विंटल दराने खरेदी झाली.

राज्यात बारदान्याअभावी ठप्प झालेली सोयाबीन खरेदीची मुदत १२ जानेवारी रोजी संपल्यानंतर पुन्हा एकदा केंद्र सरकारने ३१ जानेवारीपर्यंत खरेदीस मुदतवाढ दिली. तरीही स्थानिक बाजारात सोयाबीनच्या दरात घसरण सुरूच आहे.

सोमवारी (ता.२०) अमरावती कृषी उत्पन्न बाजार समितीत ९ हजार ९९५ क्विंटल सोयाबीनची आवक झाली. किमान ३८००, तर कमाल ४०५० रुपये म्हणजे सरासरी ४००० रुपये प्रति क्विंटल दर मिळाला. गेल्या ११ जानेवारीला ७ हजार ५३९ क्विंटल आवक होऊन किमान ३ हजार ९५०,

कमाल ४ हजार २१२ म्हणजे सरासरी ४ हजार ८१ रुपये प्रति क्विंटल दर मिळाला होता. गेल्या तीन ते चार दिवसांत सोयाबीनच्या दरात केवळ २५ रुपयांची वाढ झाली आहे. विदर्भातील इतर बाजार समित्यांमध्ये हीच परिस्थिती असून अनेक ठिकाणी सोयाबीनचे सरासरी खरेदी दर हे चार हजारांपेक्षा कमी आहेत.

‘नाफेड’ची १२ टक्के ओलाव्याची अट

यंदाच्या हंगामात सोयाबीनचे उत्पादन चांगले झाले असले तरी खुल्या बाजारात साडेतीन ते चार हजार रुपये दर मिळत असल्याने हमीभावाने खरेदी करावी, यासाठी शेतकरी आग्रही आहेत. मात्र, ‘नाफेड’ने १२ टक्के ओलाव्याची अट घातल्याने आत्तापर्यंत नोंदणी केलेल्या सात लाख ४९ हजार शेतकऱ्यांपैकी केवळ दोन लाख ५ हजार ५३९ शेतकऱ्यांचे सोयाबीन खरेदी केले आहे.