Jalgaon News : खानदेशात कापूस आवकेत घट झाली आहे. दरातही किंचित सुधारणा झाली असून, खेडा खरेदीत ६८०० ते ७००० रुपये प्रतिक्विंटल दर मिळत आहेत. कापसाची आवक मागील महिन्यात व या महिन्याच्या पहिल्या सात ते आठ दिवस प्रतिदिन सरासरी ५० हजार क्विंटल होती.

परंतु मागील तीन-चार दिवसांपासून कापूस आवकेत घट झाली असून, सध्या प्रतिदिन ४० हजार क्विंटल आवक खानदेशात होत आहे. खेडा खरेदीत कापसाचे दर मागील महिन्यात सरासरी ६६०० रुपये प्रतिक्विंटल होते. या महिन्याच्या सुरुवातीला खेडा खरेदीतील दरात घसरण होऊन ते ६५०० रुपये प्रतिक्विंटल झाले.

यामुळे शेतकऱ्यांना कमी दरात कापसाची विक्री करावी लागत होती. परंतु आवकेत या आठवड्यात सतत घट झाली. यामुळे कापूस दरातही सुधारणा झाली आहे. कापूस दरात मोठी वाढ खेडा खरेदीत झालेली नाही, परंतु सुधारणा दिसत असल्याने ज्यांच्याकडे कापूस आहे, त्यांना काहीसा दिलासा मिळत आहे.

शेतकऱ्यांकडील साठा संपत आला

शेतकऱ्यांकडील साठा संपत आल्यानेच कापसाची बाजारातील आवक घटली आहे. जानेवारीत आवकेत मोठी वाढ झाल्याने दरांवर सतत दबाव होता. तशीच स्थिती या महिन्याच्या पहिल्या ११ ते १२ दिवसांतही दिसत होती.

परंतु शेतकऱ्यांकडील साठा आजघडीला २० ते २२ टक्केच आहे. दरात फारशी सुधारणा होत नसल्याने अनेकांनी कापसाची विक्री केली. यामुळे गावोगावी शेतकऱ्यांकडील कापूससाठा घटला. दरात सुधारणा होत आहे, पण त्याचा लाभ अत्यल्प शेतकऱ्यांना होत आहे.