Jalgaon News: खानदेशात पपईची आवक पुढील पंधरवड्यात किंवा सप्टेंबरमध्ये वाढू शकते. सध्या दररोज पाच ते सहा ट्रक (एक ट्रक १६ टन क्षमता) आवक होत असून, १८ ते २० रुपये प्रति किलोचा दर शेतकऱ्यांना जागेवर किंवा शिवार खरेदीत मिळत आहे. शेतकऱ्यांना कमी दर दिले जात असून, २५ रुपये प्रतिकिलोचा दर जागेवर किंवा शिवार खरेदीत मिळावा, अशी मागणी केली जात आहे.

पपईची काढणी ऑगस्टमध्ये गती घेते. जुलैमध्ये काढणीला काही भागात सुरुवात झाली आहे. नंदुरबार जिल्ह्यात सर्वाधिक सुमारे सहा हजार हेक्टरवर पपई आहे. त्यात शहादा तालुक्यात साडेचार हजार हेक्टर एवढे पपईचे क्षेत्र आहे. पपईची लागवड धुळ्यातील शिरपूर, जळगावमधील यावल, चोपडा, जामनेर, मुक्ताईनगर, रावेर भागांतही झाली आहे.

आवक जूनपासून कमी आहे. मागील हंगामात काढणीला ऑगस्टच्या मध्यानंतर सुरुवात झाली होती. सप्टेंबरअखेरीस काढणीला गती आली होती. त्या वेळेस शिवार खरेदीत किंवा थेट जागेवर ३० ते ३५ रुपये प्रति कलोचे दर मिळाले. नंतर २५ रुपये व सध्या १८ ते २० रुपये प्रति किलोचा दर आहे. ऑगस्टच्या अखेरीस २० रुपये प्रतिकिलोचा दर होता.

पण सध्या आवक कमी असतानाही १८ ते २० रुपये दर पपईस मिळत आहे. उत्पादन खर्चानुसार हा दर परवडत नसल्याची स्थिती आहे. कारण पपईला जेवढा खर्च लागला, तेवढे दर नाहीत, असे चित्र आहे. सध्या किमान २५ रुपये प्रतिकिलोला जागेवर दर मिळावा, अशी मागणी आहे. सध्या उत्तरेसह राज्यात सण उत्सवाचे दिवस आहेत. पपई आरोग्यदायी फळ असल्याने त्यास मागणी असते. पपईचे दर जूनमध्येही कमीच असतात. जुलैतही दरवाढ झाली नाही. आवक कमी असतानाही दर कमी का, असा मुद्दा उपस्थित केला जात आहे.

पुढे आवक वाढेल. यामुळे दरांबाबत काय स्थिती राहील, असा प्रश्‍नही आहे. कारण यंदा लागवड अधिक आहे. आगाप लागवडीच्या पपई बागा अधिक आहेत. अनेकांनी नोव्हेंबर-डिसेंबरमध्ये पपई लागवड केली होती.