Papaya Cultivation : खानदेशात पपई लागवडीत वाढ

Jalgaon News : खानदेशात पपईची लागवड यंदा जूनपर्यंत सुरू होती. लागवड पूर्ण झाली आहे. यंदा क्षेत्र १५ हजार हेक्टरवर पोचले आहे. पपई रोपांचे दरही आवाक्यात होते. तसेच अनेकांनी कापूस लागवड टाळून पपईला पसंती दिली आहे. सध्या पीक जोमात आहे.

आगाप लागवड डिसेंबर व जानेवारी महिन्यात झाली. काहींनी नोव्हेंबर २०२४ मध्येच आगाप लागवड केली. आगाप पिकात फुले, फळे लागली असून, या पिकातून नवरात्रोत्सवात काढणीदेखील सुरू होवू शकते. तर फेब्रुवारी ते जून या कालावधीत लागवड केलेल्या पिकाची वाढही बरी आहे. काळ्या कसदार अतिपावसात पिकास फटका बसतो. पण यंदा पाऊस कमी असल्याने पीक जोमात आहे.

पपईची लागवड नंदुरबार जिल्ह्यात सुमारे सात हजार हेक्टरपर्यंत आहे. एकट्या शहादा तालुक्यातील लागवड साड़ेपाच हजार हेक्टरवर झाली आहे. जळगाव जिल्ह्यात सुमारे साडेसहा हजार हेक्टर आणि धुळ्यातही सुमारे तीन हजार हेक्टरवर लागवड झाली आहे. खानदेशात पपईखालील क्षेत्र १० ते ११ हजार हेक्टरपर्यंत असायचे. पण लागवडीत यंदा वाढ झाली आहे.

कापूस पीक केले कमी, पपईला पसंती

कापूस पिकात हानी होत आहे. केळी, भाजीपाला पिकांत जोखीम आहे. यामुळे शेतकरी पपई पिकाकडे वळले आहेत. खानदेशात ७८६ व १५ नंबर पपई वाणांची लागवड झाली आहे. यात १५ नंबर वाणाच्या पपईची लागवड अधिक आहे. पपईचे दर मागील हंगामात टिकून होते. सप्टेंबर ते नोव्हेंबर या कालावधीत सरासरी दर २५ रुपये प्रतिकिलो जागेवर मिळाल्याने यंदा अनेकांनी सप्टेंबरमध्ये काढणीला येईल या दृष्टीने पपईची लागवड केली आहे.

आंतरपीक म्हणून लागवड

अनेक शेतकऱ्यांनी कलिंगडात पपईची आंतरपीक म्हणून लागवड केली होती. आता पपई पिकात अनेकांनी सोयाबीन, उडीद पिकाची लागवड केली आहे. ही लागवड मे मध्ये लागवड केलेल्या पपईत आहे. पपई पीक सर्वत्र जोमात आहे. कमी पाऊस आहे. पण ढगाळ वातावरण असल्याने शेतकरी पिकात फवारण्या घेत आहेत. कारण पिकात रोगराई येण्याचा धोका आहे.