Nagar News : नगर जिल्ह्यात कांद्याचे दर गेल्या अनेक दिवसांपासून स्थिर आहेत. नगरमधील दादा पाटील शेळके कृषी उत्पन्न बाजार समितीत शनिवारी (ता. ७) झालेल्या लिलावात कांद्याला ३०० रुपयांपापासून २८०० रुपयांपर्यंत दर मिळाला. कांदा दरवाढीची शेतकऱ्यांना आशा असताना दरात फारशी दरात वाढ होताना दिसत नाही.

नगर जिल्ह्यात खरिपासह रब्बीतही कांद्याचे उत्पादन मोठ्या प्रमाणात घेतले जाते. यंदा पावसाच्या तुटीमुळे कांद्याचे लागवड क्षेत्र कमी होऊन जिल्ह्यात सोळा हजार हेक्टरवर कांद्याची रब्बीत लागवड झाली. उन्हाळ्यातही काही प्रमाणात लागवड कमी होण्याचा अंदाज आहे.

गेल्या वर्षी मात्र उन्हाळ्यात मोठ्या प्रमाणात लागवड झाली होती. मात्र त्यानंतर कांद्याला पुरेसा दर नसल्याने अनेक शेतकऱ्यांनी कांदा विक्री केला नाही. यंदा अतिवृष्टी, गारपिटीने कांदा भिजला, त्यामुळे यंदा दरवर्षीच्या तुलनेत दोन महिने टिकवण क्षमता कमी झाली.

नगर येथील बाजार समितीसह जिल्हाभरात दर लिलावाला सुमारे दोन लाख गोण्यापर्यंत आवक होत असते. गेल्या अनेक दिवसांपासून कांदा दर वाढण्याची लोकांना आशा आहे. मात्र फारशी कांदा दरवाढ होताना दिसत नाही. शनिवारी नगर येथील दादा पाटील शेळके कृषी उत्पन्न बाजार समितीत झालेल्या लिलावाला ८६ हजार ४७२ गोण्यांची आवक झाली.

लिलावात एक नंबरच्या कांद्याला २१५० ते २८०० रुपये, दोन नंबरच्या कांद्याला १४५० ते २१५०, तीन नंबरच्या कांद्याला ९०० ते १४०० रुपये तर चार नंबरच्या कांद्याला ३०० ते ९०० रुपयांचा दर मिळाला. सरासरी २ हजारांचा दर मिळाला. पारनेर, घोडेगाव, राहुरी, अकोले, कोपरगाव, श्रीरामपूर बाजार समित्यांतही असाच दर आहे. मात्र नगर, घोडेगाव वगळता अन्य ठिकाणी फारसा दर नाही.