Indian raisin trade and Market: देशांतर्गत बाजारपेठेत बेदाण्याची मागणी काहीशी मंदावली असली तरी दर टिकून आहेत. दर्जानुसार बेदाण्याला २५० ते ३७० रुपये प्रति किलो दर मिळत आहे. आतापर्यंत १ लाख २० हजार ते १ लाख ४० हजार टनांची विक्री झाल्याचा अंदाज आहे. आता दसरा-दिवाळीच्या पार्श्वभूमीवर मागणी वाढून दर सुधारतील, अशी बेदाणा उत्पादकांना अपेक्षा आहे.

राज्यात गतहंगामात सुमारे १ लाख ८० हजार ते २ लाख टन बेदाण्याचे उत्पादन झाले. एप्रिल महिन्यात बेदाण्याच्या दर्जानुसार दर २५० ते ४०० रुपये प्रति किलो होता. मे ते जुलै या दरम्यान बेदाण्याचे दर टिकून होते. गेल्या दोन महिन्यांपासून बेदाण्याच्या दरात फारशी चढ-उतार झाली नाही.

साधारणपणे जुलैनंतर बेदाण्याला चांगला उठाव मिळतो. मागणी वाढल्याने या कालावधीत दरातही सुधारणा होते. यंदा या कालावधीत मागणी अपेक्षेइतकी वाढली नाही. गणेशोत्सवाच्या काळातही बाजारात उठाव मर्यादित राहिल्याने बेदाण्याच्या दरात मोठी तेजी-मंदी झाली नाही.

गेल्या दोन ते तीन महिन्यांपासून दर तुलनेने स्थिर आहेत. सद्यःस्थितीला शेतकऱ्यांकडे ५० ते ६० हजार टन इतका बेदाणा शिल्लक आहे. त्यामुळे गणेशोत्सवानंतर दसरा आणि दिवाळीच्या पार्श्वभूमीवर बेदाण्याची मागणी वाढण्याची अपेक्षा आहे. त्यामुळे उत्पादकांनी विक्रीचे नियोजन या कालावधीसाठी केले आहे. येत्या पंधरवड्यात मागणीत वाढ होण्याची शक्यता बेदाणा उद्योगातील जाणकारांकडून व्यक्त होत आहे. त्यामुळे बेदाणा उत्पादक शेतकऱ्यांचे दसरा-दिवाळी या सणाकडे लक्ष लागले आहे.