Amravati News: आले दर दबावात आल्याने उत्पादकांची चिंता वाढली आहे. यातील बहुतांश शेतकऱ्यांनी तर दहा हजार रुपये क्‍विंटल दराने आले (अद्रक) बेणे खरेदी केले होते. मात्र आता ३००० ते ३५०० रुपये क्‍विंटलवर दर आल्याने उत्पादन खर्चाच्या भरपाईचा प्रश्‍न त्यांच्यासमोर निर्माण झाला आहे. अमरावती बाजारात आले आवक ११० क्‍विंटलवर असून, सध्या ३५०० ते ४००० रुपये असा दर मिळत असल्याचे व्यापाऱ्यांनी सांगितले.

गेल्या काही वर्षांत शेतकऱ्यांना आले पिकातून चांगला परतावा मिळाला. त्यामुळे या पिकाखालील क्षेत्रात सातत्याने वाढ नोंदविण्यात आली. बुलडाणासह अमरावती जिल्ह्यात हे पीक घेतले जाते. सरासरी दहा हजार रुपये क्‍विंटलचा दर याला मिळाला. लागवड क्षेत्र वाढीसाठी हे एक कारण होते. यंदा मात्र या पिकाने शेतकऱ्यांची चांगलीच निराशा केल्याचे चित्र आहे. दहा हजार रुपयांवरून दर थेट ३५०० ते ४००० रुपयांवर आले आहेत. परिणामी, महागड्या खरेदी केलेल्या बेण्यावरील खर्चाची भरपाई देखील अनेकांना शक्‍य होत नाही, अशी स्थिती आहे.

शेतकऱ्यांनी दिलेल्या माहितीनुसार, ९ महिने कालावधीचे हे पीक आहे. जून महिन्यात लागवड होते. त्यानंतर फेब्रुवारीपासून काढणीस केली जाते. सध्या अमरावतीत ११० क्‍विंटल आवक होत त्याला ३५०० ते ४००० रुपयांचा दर मिळत आहे. परंतु नागपूरच्या कळमना बाजार समितीत दर आणखी दबावात असून, १५०० ते २००० रुपयांनी यापूर्वी व्यवहार झाले. सद्यःस्थितीत आले दर १५०० ते २५०० रुपयांवर आले आहेत. नागपूरच्या कळमना बाजार समितीमधील आवक अमरावतीच्या तुलनेत अधिक असून ८४० क्‍विंटल इतकी असल्याचे व्यापाऱ्यांनी सांगितले.