Market Bulletin : आंतरराष्ट्रीय बाजारात आणि देशातील बाजारात सोयाबीन तसेच सोयापेंड दरावरील दबाव कायम आहे. सोयाबीनचे वायदे कालच्या तुलनेत आज काहीसे वाढून १३.१८ डाॅलरवर होते. पण सोयापेंडचे वायदे आजही ४०० डाॅलरपेक्षा कमीच आहेत. दुपारपर्यंत सोयापेंडचे वायदे ३९८ डाॅलरवर होते.

तर देशातील बाजारात सोयाबीनचे भाव आजही ४ हजार ५०० ते ४ हजार ८०० रुपयांच्या दरम्यान दिसले. देशातील बाजारावर आंतरराष्ट्रीय बाजाराचा दबाव दिसून आला. तर आंतरराष्ट्रीय बाजारावर ब्राझीलमधील परिस्थितीचा दबाव आहे.

कापसाचा आंतरराष्ट्रीय बाजारात दोन दिवसांपासून ८० सेंट प्रतिपाऊंडपेक्षा कमीच दिसत आहे. आजही ७९.३२ सेंटवर बाजार होता. देशातील बाजार मात्र स्थिर होता. देशातील बाजारात कापसाला आजही ६ हजार ६०० ते ७ हजार २०० रुपयांच्या दरम्यान भाव मिळाला. बाजारातील आवक सरासरी सव्वा लाख गाठींच्या दरम्यान आहे.

कापसाच्या बरोबरच सरकीवरील दबावही कायम आहे. सरकीला सध्या २ हजार ५०० ते ३ हजारांच्या दरम्यान भाव मिळत आहे. कापूस बाजारातील आवक आणखी एक ते दीड महिना कायम राहू शकते, असा अंदाज आहे.

निर्यातबंदीनंतर पडलेला कांदा बाजार अजूनही सावरलेला नाही. लाल कांद्याची बाजारातील आवक वाढत असतानाच निर्यातबंदी केल्यामुळे भावावर मोठा दबाव दिसून आला. बाजारातील कांद्याची आवक अजूनही जास्त दिसते. तर सध्या बाजारात कांदा १ हजार ७०० ते २ हजार रुपये प्रतिक्विंटलने विकला जात आहे.

मागील दोन आठवडे कांदा बाजार कोसळल्याचा शेतकऱ्यांना मोठा फटका बसला. बाजारातील आवकेचा दबाव आणखी काही दिवस दिसू शकतो, असा अंदाज कांदा बाजारातील अभ्यासकांनी व्यक्त केला.

देशातील लाल मिरची उत्पादन यंदा घटण्याची शक्यता आहे.  आंध्र प्रदेश, तेलंगणा, मध्य प्रदेश, कर्नाटक आणि महाराष्ट्रातील मिरची पिकाला यंदा फटका बसला. परिणामी उत्पादकता घटली आहे. सध्या लाल मिरचीला १८ हजार ते ३२ हजार रुपये प्रतिक्विंटलपर्यंत भाव मिळत आहे.

महाराष्ट्रातील मिरची पट्ट्यातही सध्या भाव चांगले आहेत. यंदा दुष्काळामुळे यापुढील काळात मिरची उत्पादन घेणे शेतकरी टाळण्याची शक्यता आहे. त्यामुळे मिरचीच्या भावातील तेजी कायम राहू शकते, असा अंदाज व्यापारी व्यक्त करत आहेत.

देशातील बाजारात ज्वारीचे भाव तेजीत आहेत. बाजारातील पुरवठा कमी आणि मागणी जास्त यामुळे ज्वारीचे भाव वाढले आहेत. बाजारात सध्या ज्वारीला व्हरायटी आणि गुणवत्तेप्रमाणं भाव मिळतोय. मालदांडी ज्वारीचे भाव सरासरी ४ हजार ५०० ते ५ हजारांच्या दरम्यान पोचले. तर हायब्राडी ज्वारी ३ हजार ते ३ हजार ५०० रुपयांच्या दरम्यान आहे.

पांढरी आणि दादर ज्वारीचा भाव ५ हजार ते ५ हजार ५०० रुपयांच्या दरम्यान दिसतो. बाजारातील आवक आणखी काही दिवस कमीच राहण्याचा अंदाज आहे. त्यामुळे ज्वारीच्या भावातील तेजी टिकून राहू शकते, असा अंदाज ज्वारी बाजारातील व्यापारी आणि अभ्यासक व्यक्त करत आहेत.