Market intelligence : आंतरराष्ट्रीय बाजारात आज दुपारपर्यंत सोयाबीन आणि सोयापेंडच्या दरात दुपारपर्यंत नरमाई दिसून आली होती. ब्राझील आणि अर्जेंटीनातील पाऊस आणि वातावरणाची स्थिती बदलते तसे भावातही चढ उतार सुरु आहेत. सोयापेंडचे वायदे दुपारपर्यंत १३.५८ डाॅलर प्रतिबुशेल्सच्या दरम्यान होते. तर सोयापेंडचे वायदे ४५८ डाॅलरवर होते. देशातील बाजारात मात्र सोयाबीनचे भाव ४ हजार ८०० ते ५ बजार १०० रुपयांच्या दरम्यान होते. भाव स्थिर असल्याने शेतकरी मालाची विक्री कमी करत आहेत. परिणामी आंतरराष्ट्रीय बाजारात दरात चढ उतार सुरु असूनही देशातील भावपातळी कायम आहे. यापुढील काळातही सोयाबीनचे भाव स्थिरावू शकतात, असा अंदाज सोयाबीन बाजारातील अभ्यासकांनी व्यक्त केला.

आंतरराष्ट्रीय बाजारात कापसाचे वायदे स्थिर आहेत. कापसाचे वायदे इंटरकाॅन्टीनेंटल एक्सचेंजवर कापसाच्या वायद्यांनी ८०.९१ सेंट प्रतिपाऊंडचा टप्पा गाठला होता. तर देशातील वायदे ७४० रुपये प्रतिखंडीने कमी होऊन ५६ हजार रुपये खंडीवर पोचले होते. बाजार समित्यांमधील दराचा विचार करता भाव स्थिर होते. आजही देशातील बाजारात सरासरी किमान ६ हजार ८०० ते ७ हजार ४०० रुपयांचा भाव मिळत आहे. बाजारातील कापसाची आवक गेल्या काही दिवसांपासून स्थिरावली आहे. तसेच यापुढील काळातही कापूस आवक सरासरीपेक्षा कमीच राहण्याचा अंदाज आहे, असा अंदाज कापूस बाजारतील अभ्यासकांनी व्यक्त केला.

ज्वारीला बाजारात चांगला भाव मिळत आहे. ज्वारीच्या भावात मागील आठवड्यापासून चांगली वाढ झाली. काही बाजारात तर ज्वारीचा कमाल भाव सहा हजारांवर पोचला. यंदा खरिपातील उत्पादन घटले. मागील हंगामातील रब्बी उत्पादनही कमी राहिले होते. यामुळे ज्वारीचा स्टाॅक कमी होता. परिणामी बाजारातील आवक मागणीच्या तुलनेत घटलेली आहे. यामुळे ज्वारीचा सरासरी भाव ४ हजार ते ५ हजार रुपयांच्या दरम्यान पोचला. यंदा कमी पाऊस, कमी पेरा आणि पाणी टंचाईमुळे ज्वारीच्या उत्पादनात घटण्याचा अंदाज आहे.म्हणजेच यंदाही ज्वारीचा पुरवठा मागणीपेक्षा कमीच राहू शकतो. परिणामी ज्वारीच्या भावाला चांगला आधार मिळू शकतो, असा अंदाज व्यापारी व्यक्त करत आहेत.

टोमॅटोच्या भावात मागील आठवडाभरात चांगली सुधारणा दिसून आली. बाजारातील टोमॅटो आवक दिवसेंदिवस कमी होत आहे. सध्या टोमॅटोला प्रतिक्विंटल सरासरी २ हजार ५०० ते ३ हजार रुपयांचा भाव मिळत आहे. टोमॅटोचा भाव उत्पादन खर्चाच्या पातळीपेक्षा काहीसे वाढल्याचे शेतकरी आता सांगत आहेत. त्यातच टोमॅटो पिकाला सध्या बदलत्या वातावरणाचा आणि कमी पावसाचा फटका बसत आहे. तसेच अनेक शेतकऱ्यांनी भावाअभावी प्लाॅट सोडून दिले होते. या कारणांनी पुढील काही दिवसांपासून आवक आणखी कमी होऊ शकते. त्यामुळे भावात काहिशी सुधारणाही दिसू शकते, असा अंदाज टोमॅटो बाजारातील अभ्यासकांनी व्यक्त केला.

उडदाचे भाव स्थिरावले आहेत. बाजारातील उडदाची आवक कमीच आहे. पण उडदाच्या भावात तेजी आल्यानंतर नफावसुलीसाठी उडदाची विक्री वाढली होती. त्यामुळे उत्पादन आणि पुरवठा कमी असला तरी उडदाचे भाव स्थिरावले होते. त्यातच काही प्रमाणात आयातही सुरु आहे. नव्या उडदाची आवक अनेक बाजारांमध्ये सुरु झाली. यामुळेही उडदाच्या भावातील तेजी थांबली आहे. सध्या उडदाचे भाव ८ हजार ते ९ हजारांच्या दरम्यान आहेत. यंदा देशातील उडीद उत्पादन गरजेपेक्षा कमीच राहिले. तसेच सणांच्या काळात उडदाच्या डाळिला चांगला उठाव राहू शकतो. त्यामुळे उडदाच्या दरातील तेजी कायम राहू शकते. तर रब्बीतील उत्पादनही कमीच राहण्याचा आहे. त्यामुळे तेजीला आधार असल्याचे बाजारातील अभ्यासकांनी सांगितले.