Chhatrapati Sambhajinagar News: मराठवाड्यात खरिपात मका पिकाचे क्षेत्र वाढण्याचा अंदाज आहे. एकट्या छत्रपती संभाजीनगर जिल्ह्यात सुमारे सव्वादोन लाख हेक्टरपेक्षा अधिक क्षेत्रावर मका लागवडीची शक्यता आहे. जूनच्या पहिल्या आठवड्यात मकाचे सुमारे ९९९० क्विंटल बियाणे विकल्या गेले आहे. बाजारपेठ व दरातील सातत्याने मका लागवडीकडे शेतकऱ्यांचा कल आहे.

खरीप हंगामासाठी मराठवाड्यात छत्रपती संभाजीनगर, जालना, बीड या तीन जिल्ह्यांत मका पिकाचे सुमारे २ लाख ६९ हजार ६२१ हेक्टर क्षेत्र प्रस्तावित करण्यात आले आहे. या क्षेत्रामध्ये छत्रपती संभाजीनगर जिल्ह्यातील २ लाख २२ हजार ५६१ हेक्टर, जालन्यातील ३९ हजार ८६० हेक्टर तर बीडमधील ७२०० हेक्टर क्षेत्राचा समावेश आहे.

गतवर्षी खरिपात छत्रपती संभाजीनगर जिल्ह्यात २ लाख ६ हजार हेक्टर क्षेत्रावर मक्याची लागवड झाली होती. यंदा आर्द्रता व खरेदीचे नियम पाळणाऱ्या शेतकऱ्यांना २१०० ते २२५० रुपये प्रति क्विंटलपर्यंत मक्याचा दर मिळाला. तो दर सातत्याने मेपर्यंत टिकून होता आणि आहे.