Jalgaon News : राज्यासह परदेशात पोहोचलेल्या जळगावच्या भरताच्या वांग्यांचे दर यंदा कमी आहेत. आवक अधिक असून, शेतकऱ्यांना बाजार समितीत सध्या १० ते १२ रुपये प्रतिकिलोचा दर मिळत आहे.

सध्या बाजार समितीत रोज २५ ते २७ क्विंटल भरताच्या वांग्यांची आवक होत आहे. ही आवक जळगाव तालुक्यातील नशिराबाद, बेळी, जळगाव खुर्द, भुसावळातील वरणगाव, पिंपळगाव, तळवेल, जामनेरातील हिंगणे व परिसर, एरंडोल, भडगाव आदी भागांतून होत आहे. यंदा सुरुवातीलाच आवक अधिक आहे.

हिरवी गोलाकार, मोठ्या आकारातील वांगी बाजारात येत आहेत. मागील हंगामात भरताच्या वांग्यांची आवक सप्टेंबरमध्ये कमी होती. अतिपाऊस व कीड-रोग यात मागील वेळेस पीकहानी झाली होती. यंदा मात्र पीकहानी कमी आहे.

तसेच लागवडदेखील अधिक आहे. यामुळे आवकही अधिक आहे. जळगाव बाजार समितीत सर्वाधिक आवक होत आहे. अद्याप यावल, रावेरातील चमकदार, लांबट व आकाराने मोठ्या भरताच्या वांग्यांची आवक सुरू झालेली नाही.

या वांग्यांना मोठी मागणी असते. या भागातील वांगी यंदा ऑक्टोबरच्या मध्यात काढणीवर येतील, असे दिसत आहे. यावलमधील बामणोद, पाडळसे, भालोद, न्हावी, आमोदे बुद्रुक, सांगवी बुद्रुक, किनगाव या भागांत भरताची वांग्यांचे पीक अधिक असते. रावेरातील मस्कावदसीम, मस्कावद बुद्रुक, वाघोदा, चिनावल, रोझोदा, खिरोदा आदी भागांत भरताच्या वांग्यांचे पीक जोमात असते. यंदाही या भागात पीक आहे.

अनेकांनी रोपवाटिकांमधून रोपांची खरेदी करून भरताच्या वांगी पिकाची लागवड जूनमध्ये केली होती. तर काहींनी पारंपरिक वाणांचा उपयोग करून आपल्या शेतात रोपवाटिका तयार केल्या व त्यातील रोपांचा उपयोग करून लागवड केली होती. आगाप लागवड जूनच्या सुरुवातीलाच केली जाते. तर नियमित किंवा मुख्य हंगामातील लागवड जुलैच्या अखेरीस केली जाते.

यंदा जिल्ह्यात सुमारे ३०० हेक्टरवर लागवड झाली आहे. लागवड ५० ते ६० हेक्टरने वाढली आहे. बाजारात आवक अधिक आणि उठाव कमी आहे. कारण भरताच्या वांग्यांची मागणी दिवाळीनंतर किंवा हिवाळ्यात अधिक असते. याच काळात दरही अधिक मिळतात, असे शेतकरी आणि व्यापाऱ्यांनी सांगितले.