Nagpur News : एक दिवसांचे पिल्लू त्यासह मका आणि तयार खाद्याच्या दरात झालेल्या वाढीच्या परिणामी ब्रॉयलर चिकनचा उत्पादकता खर्चही वाढला आहे. सध्या ९० ते ९२ रुपये असा प्रतिकिलो उत्पादकता खर्च असून जिवंत पक्षी प्रतिकिलो ९५ रुपयांनी विकला जात आहे. त्याचवेळी चिकनचा किरकोळ विक्री दर २६० ते २८० रुपयांवर पोचला आहे.

पोल्ट्री व्यावसायिक शुभम महाले यांनी दिलेल्या माहितीनुसार, ब्रॉयलर चिकनच्या उत्पादकता खर्च वाढीत अनेक घटक कारणीभूत ठरतात. एक दिवसाच्या पिल्लांचा दर १७ रुपये होता. त्यातही वाढ होत याचे दर ३० रुपयांवर पोचले आहेत. अवघ्या वीस दिवसांत ही वाढ नोंदविण्यात आली आहे. मका दीड महिन्यात २२ रुपयांवरून २८ रुपये (२८०० रुपये क्‍विंटल) किलोवर गेला आहे.

मका दरात सातत्याने होणाऱ्या वाढीचा देखील ब्रॉयलरच्या उत्पादकता खर्चावर परिणाम होत आहे. मका दरात वाढ झाल्याने बाजारात तयार पशुखाद्य ४२ रुपये किलोवर पोचले आहे. यापूर्वी याचे दर ३६ ते २७ रुपये किलो होते. परिणामी ब्रॉयलरचा उत्पादन खर्च ९० ते ९२ रुपयांवर गेला आहे. त्याचवेळी बाजारात जिवंत ब्रॉयलर पक्षी ९५ रुपये किलोप्रमाणे विकला जात आहे.

तेलंगणा राज्य पोल्ट्री व्यवसायाचे हब म्हणून ओळखले जाते. या भागात ब्रॉयलरची उपलब्धता अधिक असल्याने या ठिकाणी जिवंत पक्ष्याचे प्रतिकिलो दर ८५ रुपयांवर आहेत. त्या भागातून देखील महाराष्ट्रात आवक होते. त्याचाही दरात परिणाम होण्याची शक्‍यता वर्तविली जात आहे

आयातीची मागणी

पोल्ट्री फिडमध्ये मक्‍याचा वापर होतो. मात्र मका दरात सातत्याने वाढ होत असल्याने शेतीपूरक व्यवसाय करणाऱ्या पोल्ट्री व्यवसायिकांच्या अडचणीत वाढ झाली आहे. कॉन्फडरेशन ऑफ इंडियन इंडस्ट्रीसह अनेक संघटनांनी मका तुटवड्याच्या पार्श्‍वभूमीवर मका आयात करावा, अशी मागणी केंद्र सरकारकडे केली आहे.

त्याकरिता मक्‍यावरील आयात शुल्क माफ करावे किंवा ते १५ टक्‍के करावे, अशी देखील मागणी आहे. भारताची मका उत्पादकता ३८० लाख टन आहे. परंतु देशांतर्गत गरज भागविण्यात ही उत्पादकता प्रभावी ठरत नाही. विशेष म्हणजे एकूण उत्पादकतेच्या ६० ते ६५ टक्‍के मक्‍याचा वापर हा पोल्ट्री फिडमध्ये होतो.