Nagar News : अपुऱ्या पावसामुळे निर्माण झालेल्या पाणीटंचाईचा मोठा फटका यंदा बटाटा उत्पादनाला बसला आहे. बटाटा उत्पादनात पस्तीस ते चाळीस टक्क्यांची घट झाली असल्याचे बटाटा उत्पादक शेतकरी सांगत आहे. बटाट्याला मात्र दरवर्षीच्या तुलनेत बाजारात काहीसा चांगला दर असल्याचे दिसून येत आहे.

राज्यातील नगर, नाशिक, पुणे, सोलापूर, सांगलीसह मराठवाड्यातील अनेक भागांत बटाट्याचे उत्पादन घेतले जाते. दुष्काळी आणि अल्प पाण्याचे प्रमाण असलेल्या भागात बटाटा उत्पादनाला शेतकरी प्राधान्य देतात. साधारण ऑक्टोबर- नोव्हेंबरमध्ये लागवड करून फेब्रुवारी, मार्च महिन्यांत काढणी होते.

नगर जिल्ह्यातील दुष्काळी पट्टा असलेल्या भालगाव (ता. पाथर्डी), राहाता, कोपरगाव भागात बटाटा उत्पादन घेणारे शेतकरी आहेत. अनेक भागांत बटाट्याचे ऊस व अन्य पिकांतही आंतरपीक घेतले जात आहे. दुष्काळी भागतील अनेक ठिकाणी बटाट्याच्या पिकांवर अर्थकारण अवलंबून आहे.

यंदा सुरुवातीपासूनच पुरेसा पाऊस नव्हता, परतीचा पाऊसही झाला नाही. त्यामुळे बटाट्याची लागवड झाली, परंतु शेवटच्या टप्प्यात पाणी मिळाले नसल्याने बटाटा पोसण्याला अडसर आल्याने उत्पादन कमी झाले आहे. यंदा साधारण तीस ते चाळीस टक्के फटका बसला असल्याचे शेतकरी सांगत आहेत.

बाजारात दर चांगला

उन्हाळ्यातील मागणीचा विचार करता फेब्रुवारी, मार्च महिन्यांत तुलनेने बटाट्याचे अधिक उत्पादन घेतले जाते. सध्या बाजारात दररोज प्रत्येक बाजार समितीत दोनशेपासून एक हजार क्विटंलपर्यंत आवक होत आहे. बाजारात प्रति क्विंटलला सहाशेपासून दोन हजार दोनशे रुपयांपर्यंत दर मिळत आहे. गेल्या वर्षीच्या तुलनेत हा दर बरा असल्याचे शेतकरी सांगत आहेत.