Pune News: इस्त्राईल आणि इराण यांच्यातील युध्दामुळे जागतिक बाजारात खाद्यतेलाचे भाव वाढले आहेत. त्यातच कांडला बंदरावर व्हेसल्स खाली करण्यासाठी उशीर होत असल्याने आयात खर्च वाढत आहे. त्यामुळे खाद्यतेलाच्या भाववाढीत भर पडली आहे, असे साॅल्वेंट एक्सट्रॅक्टर्स असोसिएशन ऑफ इंडिया (एसईए)चे अध्यक्ष संजीव अस्थाना यांनी म्हटले आहे.

केंद्र सरकारने खाद्यतेलाच्या किमती कमी करण्यासाठी काही दिवसांपूर्वी आयातशुल्क कमी करण्याचा निर्णय घेतला होता. त्याचा शेतकऱ्यांना फटका बसला. परंतु इस्त्राईल आणि इराण यांच्यामध्ये सुरु असलेल्या युध्दाचा परिणाम जागतिक बाजारावर झाला आहे. खाद्यतेलाचे भाव टनामागे ४० ते ७० डाॅलरने वाढले आहेत. त्यामुळे देशांतर्गत भाव कमी करण्यासाठी सरकारने योजलेले उपाय प्रभावी ठरताना दिसत नाहीत.

सरकारने खाद्यतेल आयातशुल्कात कपात केल्यानंतर भाव कमी झाले होते. मात्र युध्दामुळे जागतिक बाजारात सुरू असलेल्या घडामोडींमुळे दर पुन्हा वाढत आहेत, असे श्री. अस्थाना म्हणाले.

कांडला बंदरावर उशीर

कांडला बंदरांवर सध्या कंटेनर खाली करण्यासाठी उशीर होत आहे. “ कांडला बंदर खाद्यतेलाच्या दृष्टीने महत्वाचे आहे. या बंदरावर अनेक मोठ्या तेल रिफायनरी आहेत. या रिफायनरींमधून उत्तर आणि पूर्व भारतात तेलाचा पुरवठा होतो. कांडला बंदरावर १६ जून रोजी २ व्हेसल्स खाली करण्याचे काम सुरु होते. त्यामध्ये ४५ हजार टन तेल होते. तर ८ व्हेसेल्स थांबून होत्या. तसेच ५ व्हेसल्स पुढील आठवड्यात दाखल होण्याची शक्यता आहे. सध्या ९ ते १० दिवस वाट पाहावी लागत आहे. आयातीचा ओघ पाहता पुढे १५ ते २० दिवस उशीर लागू शकतो.”

व्हेसल्स रिकाम्या करण्यासाठी उशीर झाल्यानेल आयात खर्च वाढेल आणि देशात तेलाचे भाव वाढतील. एसईएने हा प्रश्न गुजरात सरकार आणि कांडला बंदर प्रशासनाच्या लक्षात आणून दिला असून आणि खाद्यतेलाच्या व्हेसल्स खाली करण्याला प्राधान्य देण्याची मागणी केली आहे.