Pune News : देशातील १० टक्क्यांनी कमी झालेली लागवड आणि पिकाचे झालेले नुकसान यामुळे कापूस उत्पादन यंदा ७ टक्क्यांनी घटण्याची शक्यता आहे. कापूस उत्पादन यंदा ३०२ लाख गाठींवर स्थिरावण्याचा अंदाज आहे. तर निर्यात कमी राहून आयात वाढू शकते, असा अंदाज कॉटन असोसिएशन ऑफ इंडियाने व्यक्त केला.

कॉटन असोसिएशन ऑफ इंडिया अर्थात सीएआयने २०२४-२५ च्या हंगामाचा पहिला अंदाज व्यक्त केला. गेल्या वर्षी देशातील कापूस उत्पादन ३२५ लाख गाठी होते. त्यात यंदा २३ लाख गाठींची घट होण्याचा अंदाज आहे. यंदाच्या हंगामातील उत्पादन ३०२ लाख गाठींवर स्थिरावण्याचा अंदाज सीएआयने व्यक्त केला.

चालू हंगामात गेल्या हंगामातील शिल्लक साठा ३० लाख गाठींवर आहे. गेल्या वर्षीच्या तुलनेत शिल्लक साठा काहीसा अधिक आहे. देशातील उत्पादन घटले तरी वापर कायम राहण्याचा अंदाज आहे. त्यामुळे आयात वाढणार आहे. नुकत्याच संपलेल्या हंगामात भारताने १७ लाख ५० हजार गाठी आयात केली होती. चालू हंगामात भारत २५ लाख गाठी कापूस आयात करण्याची शक्यता आहे. कापूस आयातीत यंदा ७.५ लाख गाठींची वाढ होण्याचा अंदाज आहे. यंदा देशातून कापूस निर्यात कमी राहण्याचा अंदाज आहे. नुकत्याच सरलेल्या हंगामात भारताने २८ लाख ५० हजार गाठी कापूस निर्यात केली होती. यंदा कापूस उत्पादनात घटीचा अंदाज आहे, तर कापूस निर्यात १८ लाख गाठींवरच स्थिरावेल, असा अंदाज सीएआयने व्यक्त केला.

गुजरातमध्ये यंदा मोठी घट

उत्तर भारत आणि गुजरातमध्ये उत्पादनातील घट जास्त आहे. गेल्या हंगामात गुजरातमध्ये ९० लाख ५० हजार गाठी उत्पादन झाले होते. यंदा उत्पादन ८० लाख गाठींवर स्थिरावण्याचा अंदाज आहे. म्हणजेच उत्पादनात १० लाख ५० हजार गाठींची घट होण्याचा अंदाज आहे. पंजाब, हरियाना, राजस्थानमधील उत्पादनात ९ लाख ६२ हजार गाठींची घट होणार आहे. महाराष्ट्रातही उत्पादन काहीसे कमी होईल. तेलंगणा, आंध्र प्रदेश, तमिळनाडू. ओडिशातील उत्पादनातही घट होईल, असा अंदाज सीएआयने व्यक्त केला.

२०२४-२५ मधील कापूस ताळेबंद (लाख गाठींत)

उत्पादन ३०२.२५

शिल्लक साठा ३०.१९

आयात २५

एकूण पुरवठा ३५७.४४

वापर ३१३

निर्यात १८

शेवटी शिल्लक २६.४४

राज्यनिहाय उत्पादनातील

घट (लाख गाठींत)

राज्य घट

गुजरात १०.५०

राजस्थान ७.६७

हरियाना १.३०

तेलंगणा १

आंध्र प्रदेश १

पंजाब ०.६५

महाराष्ट्र ०.५५

ओडिशा ०.५२

तमिळनाडू ०.२५