Cotton Market : कापसाच्या दोन लाख गाठींची दररोज आवक

Jalgaon News : देशात सध्या दररोज दोन लाख कापूस गाठींच्या (एक गाठ १७० किलो रुई) म्हणजेच १० ते साडेदहा लाख क्विंटल कापसाची आवक होत आहे. ही आवक मागील हंगामाच्या तुलनेत दुप्पट आहे. आवक अधिक असल्याने दरात सुधारणा दिसत नसल्याचे जाणकारांचे मत आहे.

मागील वर्षी देशात रोज एक लाख गाठींच्या कापसाची रोज आवक होत होती. यंदा मात्र ही आवक दुप्पट आहे. आवक अधिक असल्याने दरात फारशी वाढही दिसत नसल्याचे चित्र आहे. राज्यात ५० ते ५५ हजार कापूस गाठींच्या कापसाची आवक होत आहे. ही आवकदेखील बऱ्यापैकी आहे. कापसाचे दर राज्यात किंवा देशात वेगवेगळे आहेत.

एका खंडीचे दर (३५६ किलो रुई) ५४ हजार ते ५४ हजार ५०० रुपये असे आहेत. खंडीच्या दरातही मागील सात ते आठ दिवसांत काहीशी घसरण झाल्याची माहिती मिळाली. सध्या देशात गुजरात, तेलंगण व महाराष्ट्रात कापसाची सर्वाधिक आवक होत आहे. खानदेश व मराठवाड्यात मिळून रोज मोठी कापसाची आवक होत आहे.

सरकीचे दर २७०० रुपये प्रतिक्विंटल असे आहेत. तर दर मागील वर्षी जानेवारीत सरकीचे दर ३२०० रुपये प्रतिक्विंटल, असे होते. यंदाच्या हंगामात ऑक्टोबरमध्ये सरकीचे दर ३००० ते ३१०० रुपये प्रतिक्विटल, असे होते. परंतु सरकीच्या दरात सतत घट झाली आहे. सोयाबीनचे दरही ४८०० ते ४९०० रुपये प्रतिक्विंटल, असे होते.

त्यात घसरण झाली असून, सोयाबीन दर ४४०० ते ४५०० रुपये प्रतिक्विंटल आहेत. यामुळे सरकी तेल, सरकी ढेपला याला उठाव कमी असून, सरकी दरांवर दबाव वाढत असल्याची माहिती आहे.

शेतकऱ्यांकडील साठा ३५ ते ४० टक्के

सध्या देशात एकूण १६० ते १६५ लाख कापूस गाठींच्या कापसाची आवक झाली आहे. अर्थात, शेतकऱ्यांकडे ३५ ते ४० टक्के कापूस अद्याप साठविलेला आहे, असा दावा बाजारातील जाणकार करीत आहेत. परंतु यंदा कोरडवाहू कापसाचे उत्पादन एकरी ८० किलो ते एक क्विंटल एवढेच आले.

महाराष्ट्र, तेलंगणात उत्पादनात मोठी घट झाली असून, देशात एकूण २८० लाख गाठींचे उत्पादनही शक्य नाही, असेही सांगितले जात आहे. यामुळे आता शेतकऱ्यांकडील साठा फारसा शिल्लक नाही, असाही कयास लावला जात आहे.