Pune News: देशातील बाजारात मिरचीचे भाव कमी झाले आहेत. मागील वर्षभरात लाल मिरचीचे भाव ४० टक्क्यांनी कमी झाले. सध्या महत्वाच्या मिरची उत्पादक राज्यांमध्ये मिरचीला प्रतिक्विंटल १२ हजारांच्या दरम्यान भाव मिळत आहे. भाव कमी झाल्याने शेतकरी अडचणीत आले आहेत. त्यामुळे आंध्र प्रदेश आणि तेलंगणातील शेतकरी आंदोलनाच्या तयारीत आहेत.

देशातील बाजारात मिरचीच्या भावात मागील वर्षात चांगली तेजी होती. २०२३ मध्ये मिरचीचा भाव २५ हजारांपर्यंत पोचला होता. कारण कमी पावसामुळे देशातील मिरची उत्पादन कमी झाले होते. मागणी मात्र कायम होती. त्यामुळे दरात चांगली तेजी आली. मिरच्याचे भाव विक्रमी पातळीवर पोचले होते. पण देशातील मिरची लागवड २०२४ मध्ये वाढली. तसेच मिरचीसाठी पोषक वातावरण होते. त्यामुळे उत्पादन वाढीचा अंदाज आधीपासूनच देण्यात आला. त्यानंतर भाव कमी होत गेले. जानेवारी २०२४ मध्ये मिरचीचा भाव १९ हजारांवर पोचला होता.

जागतिक पातळीवर ५५ ते ६० लाख टनांच्या दरम्यान मिरची उत्पादन होत असते. त्यापैकी भारत जवळपास निम्मे उत्पादन घेतले जाते. देशात मागील हंगामात २८ लाख टन मिरची उत्पादन झाले होते. आंध्र प्रदेश आणि तेलंगणात मोठ्या प्रमाणात उत्पादन होते. मागील काही वर्षात भाव मिळत नसल्याने या दोन्ही राज्यातील मिरची लागवड कमी होत आहे. तरीही शेतकऱ्यांना भाव मिळत नसल्याचे शेतकऱ्यांचे म्हणणे आहे. इतर राज्यातील मिरचीच्या दरावरही परिणाम झाला आहे.

बाजारात मिरचीचे भाव एका वर्षातच १० ते १२ हजार रुपयांवर आले. उत्पादन वाढीचा अंदाज असल्याने शेतकऱ्यांना कमी भाव मिळत आहे. जानेवारी २०२५ मध्ये लाल मिरचीचे भाव १४ हजार रुपयांवर होते. तो भाव आता १० ते १२ हजारांवर आले. म्हणजेच गेल्या महिन्याभरातच मिरचीचे भाव जवळपास २ हजार ते ४ हजाराने कमी झाले. यामुळे शेतकरी अडचणीत आले आहेत.

शेतकरी आंदोलनाच्या तयारीत

तेलंगणात लाल मिरचीचे उत्पादन चांगले होते. मागील काही वर्षांपासून भाव मिळत नसल्याने शेतकऱ्यांनी लागवड कमी केली. मात्र तरीही मिरचीला भाव मिळत नाही. यंदा तर भाव उत्पादन खर्चापेक्षा कमी झाले आहेत. यामुळे तेलंगणातील शेतकरी आंदोलनाच्या तयारीत आहेत. तेलंगणातील मिरची उत्पादक भागात शेतकऱ्यांमध्ये सध्या रोष दिसून येत आहे.