Amaravati News : विदर्भातील यवतमाळ, अमरावती, कारंजा (वाशीम) या भागात उन्हाळी भुईमुगासह तिळाची लागवड होते. या दोन्ही शेतीमालाची वाढलेली आवक आता कमी झाली आहे.

अमरावती बाजारात भुईमूग शेंगांची दरदिवशी सरासरी केवळ २० क्‍विंटल आवक होत असल्याचे व्यापारी सूत्रांनी सांगितले. त्याच वेळी तिळाला ११ ते १२ हजार रुपयांचा दर मिळत आहे. यापूर्वी तिळाचे दर दबावात होते.

यवतमाळ जिल्ह्यात उन्हाळी भुईमुगाचा पॅटर्न होता. परंतु गेल्या काही वर्षांत या पिकावर बुरशीजन्य रोगांचा प्रादुर्भाव वाढीस लागला. परिणामी, शेंगधारणा न होणे, त्यासोबतच इतरही अनेक प्रादुर्भाव या पिकावर दिसून येत होते. त्यामुळेच या पिकाचा पिच्छा सोडत शेतकऱ्यांनी तीळ लागवडीवर भर दिला.

दारव्हा तालुक्‍यातील काजीपूर हे तीळ लागवडीमुळे नावारूपास आले आहे. तसेच महागाव तालुक्‍यातील उटी, पांढरकवडा या भागातही तीळ लागवड होते. अमरावती जिल्ह्याच्या मेळघाटात मात्र शेतकऱ्यांनी भुईमूग लागवडीत सातत्य राखले आहे.

सध्या उत्पादित शेतीमालाचा हंगाम अंतिम टप्प्यात असल्याने भुईमुगासह तीळ विक्रीसाठी बाजारात येत आहे. आवक सातत्याने कमी-जास्त होत असल्याचे व्यापारी सूत्रांनी सांगितले. अमरावती बाजारात दर दिवशी भुईमुगाची सरासरी १२० क्‍विंटल आवक होते. आता ती कमी झाली आहे. गेल्या हंगामाच्या शेवटी भुईमुगाचे दर ५००० रुपयांवर गेले होते.

सध्या भुईमूग शेंगांचे व्यवहार ५८०० ते ६२५० रुपयांनी होत असल्याचे व्यापारी सूत्रांनी सांगितले. त्याच वेळी तिळाला ११००० ते १२००० रुपयांचा दर मिळत आहे. कारंजा लाड (जि. वाशीम) बाजार समितीत देखील तिळाची आवक होत आहे.

सुमारे ३० क्‍विंटल तिळाची आवक कारंजा बाजार समितीत होत आहे. यापूर्वी आवक १५० क्विंटल वर होती. तिळाला ११४५० ते ११५०५ रुपयांचा दर मिळाला. कारंजा बाजार समितीत आवक ५५० क्विंटल इतकी आहे. शेंगांचे दर ५२०० ते ६८०० रुपये प्रतिक्विंटल असे होते.

यवतमाळमध्ये भुईमूग दरात वाढ

यवतमाळ बाजार समितीत देखील तिळाची आवक होत असून, त्यास ११ हजार ७०० ते ११ हजार ८०० रुपये दर मिळत आहेत. यापूर्वी येथे दर ११७०० ते १२८०० रुपयांवर होते. त्यात मोठी घट झाली.

याच बाजारात भुईमुगाला ६०३६ ते ६२८५ रुपयांचा दर मिळत आहे. यापूर्वी यवतमाळ बाजार समितीमध्ये भुईमुगाचे दर दबावात होते. आता आवक कमी होत असल्याने दरात वाढ अनुभवली जात आहे.