Sesame Market : विदर्भातील बाजारात तीळ १२ हजार रुपयांवर

ॲग्रोवन वृत्तसेवा
Sesame Production : नागपूर ः विदर्भातील काही बाजार समित्यांमध्ये तिळाच्या दरात पुन्हा तेजी अनुभवली जात आहे. कारंजा बाजार समितीत १२ हजार रुपये क्‍विंटलने व्यवहार होत असतानाच १०० क्‍विंटलच्या आत तिळाची आवक असलेल्या अमरावती बाजार समितीत ११००० ते ११७५० असा दर मिळत आहे. यापुढील काळात दरात सुधारणांची अपेक्षा व्यक्‍त केली जात आहे.

कारंजा लाड (वाशीम) बाजार समितीत १५० क्‍विंटल तिळाची आवक होत आहे. या बाजार समितीत सध्या तिळाला कमीत कमी ११७०५ तर जास्तीत जास्त १२२५५ रुपयांचा दर मिळत असल्याचे व्यापारी सूत्रांनी सांगितले. १२०४० रुपये सरासरी याप्रमाणे तिळाचे व्यवहार या ठिकाणी होत आहे. तिळाखालील सर्वाधीक क्षेत्र यवतमाळ जिल्ह्यात आहे.

या भागातील शेतकऱ्यांनी कीड, रोगाचा वाढता प्रादुर्भाव व त्याच्या परिणामी घटती उत्पादकता या कारणामुळे भुईमुगाऐवजी तिळाला पसंती दिली. त्यामुळे यवतमाळ बाजार समितीत तिळाची आवकही वाढती राहते. सद्या या बाजार समितीत १०५०० ते ११६०० रुपयांचा दर मिळत आहे. या बाजारात दरात मोठ्या प्रमाणावर चढउतार होत असल्याचे सांगण्यात आले. १२ जून रोजी १०२०० ते ११७०० रुपयांचा दर होता. त्यानंतरच्या काळात दरात सुधारणा अनुभवण्यात आली.

भुईमूग ६३०० रुपयांवर
अमरावती बाजार समितीत भुईमुगाचे व्यवहार ५३०० ते ६२०० रुपयांनी होत आहेत. या ठिकाणी ५८५ क्‍विंटलची आवक झाली. कारंजा लाड बाजार समिती भुईमूग आवकेसाठी देखील ओळखली जाते. या ठिकाणी ८०० क्‍विंटल इतकी भुईमुगाची आवक नोंदविण्यात आली. भुईमुगाचे व्यवहार ४५५० ते ६३०० रुपयांनी होत आहेत. यवतमाळ बाजार समितीचा विचार करता या ठिकाणी भुईमुगाला ५३९५ ते ६२३० रुपयांचा दर मिळाला.