Wardha News: बाजारात हापूस आंबे सध्या १००० ते १२०० रुपये डझनप्रमाणे विकले जात आहेत. हापूसचा एक आंबा १०० ते १२५ रुपयांना पडतो. तर दुसरीकडे हापूसबरोबरच इतर आंबे १६० ते १८० रुपये किलो या दराने बाजारात विक्रीसाठी उपलब्ध आहेत.

उन्हाळ्याची सुरुवात होताच वर्ध्याची बाजारपेठेत आंब्यांनी सजली आहे. रत्नागिरी, देवगड आणि आंध्रचाही हापूस वर्ध्याच्या बाजारपेठेत आला आहे. हापूसच्या दरात यंदा वाढ झाली असली तरी ‘एकदा तरी चाखून बघा...’ अशा इच्छेमुळे वर्धेकरही हापूस खरेदी करीत आहेत.

उन्हाळा सुरू होताच बाजारपेठेत आंब्याची आवक वाढते. यावर्षीही एप्रिल महिन्यापासून आंब्याचा बाजार सजला आहे. बाजारपेठेत साधारणतः बैगनपल्ली, तोतापुरी, केसर आंबा, पेवंदी, निलम यासह काही प्रमाणात गावरान आंबेही विक्रीसाठी येत आहेत. पण, आंब्याचा राजा म्हणून ओळखल्या जाणाऱ्या हापूसला मागणी असल्याने वर्ध्यातील बाजारात सर्व प्रकारच्या आंब्यासह रत्नागिरी, देवगड आणि आंध्राचा हापूस आंबाही एप्रिलच्या अखेरीस आला आहे.

रत्नागिरी व देवगडचा हापूस सध्या १००० ते १२०० रुपये डझन असून आंध्रचा हापूस १८० रुपये किलो या दराने विकला जात आहे. मागील वर्षीच्या तुलनेत यावर्षी भावात वाढ झाली आहे. असे असले तरी हापूसच्या खरेदीकडे वर्धेकरांचा कल कायम आहे. सध्या उन्हाळ्याच्या सुट्यांमुळे पाहुण्यांचे आगमनही झाल्याने पाहुणचाराकरिता हापूसची मागणीही वाढली आहे. वाढती मागणी लक्षात घेत आंबे विक्रेत्यांनीही आंब्यानी बाजारपेठ सजविलेली दिसून येत आहे.