Solapur News : पावसाळ्यात जनावरांना घटसर्प, फऱ्या, आंत्रविषार या आजारांची लागण होते. त्या पार्श्‍वभूमीवर पशुसंवर्धन विभागाकडून जिल्ह्यात मॉन्सूनपूर्व लसीकरण मोहीम राबविण्यात आली.

या मोहिमेंतर्गत १० लाख ९२ हजार जनावरांना लस देण्यात आली. तसेच काही वर्षांपासून जनावरांत लम्पीचाही प्रादुर्भाव होत आहे. त्यामुळे पाच लाख ११ हजार जनावरांना लम्पीचीही लस देण्यात आली.

अशाप्रकारे एकूण १६ लाख तीन हजार जनावरांना लस देण्यात आली आहे. जिल्ह्यातील सर्व जनावरांना जंतनाशके दिल्यानंतर मॉन्सूनपूर्व लसीकरण मोहीम राबविण्यात येत आहे.

पावसाळ्यात म्हैसवर्गीय जनावरांना घटसर्प, गायवर्गीय जनावरांना फऱ्या व शेळ्या-मेंढ्यांना आंत्रविषार आजारांची लागण होते. विशेषतः नदीकाठच्या भागात याचा जास्त प्रादुर्भाव होतो. त्यामुळे या मोहिमेंतर्गत लसीकरण करण्यात येत आहे.

त्यासाठी राज्य व केंद्र सरकारकडून लस उपलब्ध करून दिल्या आहेत. तसेच गेल्या काही वर्षांत गायवर्गीय जनावरांत लम्पी या त्वचारोगाचेही प्रमाण वाढत आहे. त्यामुळे या आजारांना रोखण्यासाठी लसीकरण सुरू आहे.

लसीकरणावर एक दृष्टिक्षेप

घटसर्प : ३,४५,७०२

फऱ्या : १,७४,४९४

आंत्रविषार : ५,७१,८५४

एकूण : १०,९२,०४९

लम्पी : ५,११,०००