Solapur News : बार्शी तालुक्यातील उपळे, पानगाव मंडलातील मळेगाव, ढाळे पिंपळगाव, महागाव, साकत, जामगाव, हिंगणी येथे २ सप्टेंबर रोजी मुसळधार पाऊस झाला. उपळे दुमाला मंडलात ६२.२ मिलिमीटर तर पानगाव मंडलात ५६.३ मिलिमीटर पावसाची नोंद झाली.

मळेगाव परिसरात सततच्या पावसामुळे शेतात पाणी साचून राहिले. सोयाबीन कापणीसाठी महिन्याचा अवधी असताना पिके येलो मोझॅकच्या संकटात सापडली आहेत. उपळे व पानगाव मंडलातील विविध गावांत मुसळधार पाऊस होऊनही शासकीय पर्जन्यमापक नोंदीच्या आकडेवारीत शेतकरी अडकला आहे.

शासकीय नियम, झालेला पाऊस, येलो मोझॅकचा प्रादुर्भाव, महागाईमुळे सोयाबीन उत्पादक आर्थिक संकटात सापडला आहे. दिवाळीचा सण व रब्बी हंगाम पेरणी कशी करायची, हा प्रश्न बळिराजापुढे निर्माण झाला आहे. बार्शी तालुक्यातील हिंगणी, ढाळे पिंपळगाव, मध्यम प्रकल्प, छोटे- मोठे पाझर तलाव, ओढे, नाले तुडुंब भरलेले आहेत.