Jalgaon News : अनेक वर्षे भिजत घोंगडे असलेल्या यावल उपसा सिंचन योजनेबाबत नुकतीच जलसंपदा मंत्रालयात बैठक झाली. त्यात या योजनेसंबंधी कार्यवाहीचे आदेश देण्यात आले आहेत. जलसंपदामंत्री गिरीश महाजन यांच्या मुंबई येथे मंत्रालयातील कार्यालयात ही बैठक झाली.

यावल उपसा सिंचन योजना यावल तालुक्यातील सुमारे १३ गावांसाठी लाभदायी ठरणार असून, या तालुक्यातील चार हजार हेक्टर क्षेत्रास लाभ होईल. त्यात साकळी, विरावली, वढोदे, शिरसाड, चुंचाळे, गिरडगाव, दहिगाव, वाघोदे, महेलखेडी, कोरपावली, दगडी, बोराडे आदी गावांना लाभ होणार आहे. त्यासंबंधी माहिती घेण्यात आली.

योजनेसंबंदी सुधारित प्रशासकीय मान्यता अहवाल नाशिक येथील तांत्रिक सल्लागार समितीकडे सादर करण्याचे आदेश यात देण्यात आले. या योजनेसाठी स्थायी समितीने परिगणके निश्‍चित केली होती. यांत्रिक व विद्युत विभागाकडूनही अंदाजपत्रके तयार करून घ्यावी लागतील. त्यावर कार्यवाही व्हावी, अशी मागणी या बैठकीत करण्यात आली.

या वेळी मंत्री महाजन व मुख्य सचिव दीपक कपूर यांनी सर्व बाबींची माहिती घेऊन या योजनेसंबंधीचा सुधारित प्रशासकीय मान्यता अहवाल २० दिवसांत सादर करण्याचे आदेश दिले. निम्न तापी पाडळसे प्रकल्पांतर्गत यावल उपसा योजना आहे.

चोपडा तालुक्यातील २५०० हेक्टरलादेखील या योजनेतून लाभ होणार आहे. योजनेतून सिंचन क्षमता वाढवून ती १० हजार हेक्टर करावी, अशी मागणी आमदार प्रा. चंद्रकांत सोनवणे यांनी या वेळी केली.