Satara News : जावळी तालुक्यातील आखाडे गावात काही शेतकऱ्यांना ऊस पिकावर लोकरी माव्याचा मोठ्या प्रमाणात प्रार्दुभाव झाल्याचे लक्षात आले. शेतकऱ्यांनी कृषी विभागाशी संपर्क करत प्रादुर्भावाची माहिती कृषी विज्ञान केंद्र, बोरगाव कृषी महाविद्यालय, पुणे येथील शास्त्रज्ञांनी शेतकऱ्यांच्या समवेत प्रक्षेत्र भेटी देऊन ऊस पिकाचे सर्वेक्षण केले.

प्रक्षेत्र भेटी दरम्यान कृषी महाविद्यालयाचे जैविक कीड नियंत्रण प्रयोगशाळेचे प्रमुख डॉ. संतोष मोरे यांनी उपस्थित राहून या किडीने आर्थिक नुकसान पातळी गाठली असून शेतकऱ्यांनी फवारणी करताना कीटकनाशकांच्या मात्रा गरजेपुरत्या व शिफारशीनुसारच वापराव्यात जेणेकरून मित्रकिटकांचे संगोपन होईल, असे आवाहन केले.

विषय विशेषज्ञ डॉ. स्वाती गुर्वे यांनी शेतकऱ्यांच्या दृष्टीने लोकरी माव्याची ओळख, जाती, नुकसानीचा प्रकार व जीवन चक्र याविषयी माहिती दिली. शेतकऱ्यांनी योग्य पद्धतीने एकात्मिक व्यवस्थापन करून लोकरी मावा ही कीड नियंत्रणात येऊ शकतो, असे कृषी विज्ञान केंद्र, बोरगांवचे कार्यक्रम समन्वयक डॉ. महेश बाबर यांनी शेतकऱ्यांना सांगितले.

कृषी महाविद्यालय, पुणे येथील विभागीय विस्तार केंद्राचे वनस्पती रोगशास्त्रज्ञ डॉ. विकास भालेराव यांनी ऊस पिकात फवारणीसाठी ड्रोनचा वापर करणे गरजेचे असून कीटकनाशकांची फवारणी करताना त्यामध्ये कोणतीही खते एकत्रित करू नयेत,

कारण नत्रयुक्त खतांच्या मात्रा जास्त झाल्यास लोकरी माव्या सारख्या रसशोषक किडींचा प्रार्दुभाव वाढण्याची शक्यता असल्याचे सांगितले. या वेळी उपकृषी अधिकारी एम. डी. माने, नेहा देवगुडे, पांडुरंग खाडे, सरपंच सखाराम गायकवाड, आत्माराम शिंदे, संकेत शिंदे उपस्थित होते.