Humani Pest Outbreak : मानोरा तालुक्यात हुमणी अळीचा प्रकोप

Washim News : मानोरा तालुक्यात हुमणी अळीच्या प्रकोपामुळे शेतकऱ्यांच्या उभ्या पिकांचे प्रचंड नुकसान झाले आहे. आधीच काही शेतकऱ्यांना दुबार पेरणी करावी लागल्यामुळे शेतकरी मोठ्या आर्थिक संकटात सापडला आहे.

अशात सोयाबीन पिकात हुमणी अळीच्या वाढत्या प्रकोपामुळे शेतातील झाडे वाळून जात आहेत. त्यामुळे नुकसान झालेल्या पिकांचे पंचनामे करून शेतकऱ्यांना तत्काळ आर्थिक मदत देण्याची मागणी बाधित शेतकऱ्यांकडून केली जात आहे.=

तालुक्यात या खरीप हंगामातील सोयाबीन, कपाशी यांसह अन्य पिकांवर कीडरोगांचा प्रादुर्भाव झाला आहे. त्यात मानोरा तालुक्यात हुमणी अळीचा वाढता प्रादुर्भाव शेतकऱ्यासाठी आर्थिक फटका देणारा ठरला आहे.

जमिनीच्या आत राहणारी ही अळी सोयाबीन पीक फस्त करीत असल्याने जोमात असलेली पिके अक्षरशः वाळून जात शेत रिकामे होत आहे. त्यामुळे खरिपाच्या पेरणीला केलेला खर्च वाया गेला आहे. ऐन हंगामात झालेल्या या नुकसानीमुळे शेतकरी मोठ्या आर्थिक संकटात सापडला असून त्यांच्या कुटुंबावर आर्थिक अरिष्ट्य ओढवले आहे.

पेरणीसाठी घेतलेले कर्ज कसे फेडावे, या विवंचनेत शेतकरी सापडला आहे. त्यामुळे हुमणी अळी बाधित क्षेत्राचे पंचनामे करण्याचे आदेश द्यावेत आणि बाधित शेतकऱ्यांना नुकसानीची भरपाई द्यावी, अशी मागणी शेतकरी करीत आहे.