Buldhana News : ‘‘गेल्यावर्षी शासनाने सोयाबीन, कापसाला भाव देण्यावरून फसवले. पण यंदा असा प्रयत्न केला तर सरकारच्या मानगुटीवर बसून भाव घेऊ. आता हे आंदोलन थांबणार नाही,’’ असा इशारा रविकांत तुपकर यांनी दिला.

सोमवारी (ता.२०) बुलडाण्यात कापूस-सोयाबीन दरवाढीच्या मुद्यावर आयोजित एल्गार मोर्चात ते बोलत होते. तुपकर म्हणाले, ‘‘शेतकरी मरणाच्या दारात उभा आहे. केंद्र व राज्य सरकार बघ्याची भूमिका घेत आहे.

शेतमालाला भाव का मिळत नाही, देशात सोयाबीन-कापूस उत्पादन जेथे-जेथे घेतले जाते, तेथे आंदोलन पेटवू. मागण्यांवर सात दिवसांत निर्णय न घेतल्यास २८ नोव्हेंबरला हजारो शेतकरी मुंबईकडे रवाना होतील. २९ नोव्हेंबरला मंत्रालयाचा ताबा घेऊ.’’

मोर्चाला उसळली गर्दी

सोयाबीन-कापूस उत्पादकांच्या प्रश्‍नांवर येथे आयोजित केलेल्या एल्गार महामोर्चाला हजारोंची गर्दी उसळली. हा मोर्चा जिल्हाधिकारी कार्यालयावर धडकला. कर्नाटकमधून आलेले रयत शेतकरी संघटनेचे राजू पवार, सक्षणा सलगर (धाराशिव), विठ्ठलराजे पवार (बारामती), समाधान फाटे (पंढरपूर), ॲड. राहुल घुले, गजानन कावरखे, विनायक सरनाईक, ज्ञानेश्वर खरात यांनी केंद्र, राज्य सरकारच्या धोरणांवर घणाघाती टीका केली. सोयाबीन, कापसाला भाव द्यावा, अशी मागणी केली.