Nashik News : कमी पर्जन्यमानामुळे यंदा गहू पेरण्या कमी झाल्या. सिंचन सुविधा नसलेल्या शेतकऱ्यांनी आगाप पेरण्या केल्या, अशी सोंगणी व मळणी पूर्ण झाली आहे. तर खरिपातील शेत उशिराने रिकामे झाल्यानंतर पेरण्या आता अंतिम टप्प्यात सोंगणीसाठी आहेत.

यंदा दुष्काळी परिस्थिती असल्याने जनावरांच्या चाऱ्यासाठी धावाधाव सुरू आहे. त्यामुळे काही शेतकरी आता गहू भुसा मिळवण्यासाठी सुधारित हार्वेस्टर यंत्रांचा वापर करत आहेत. तर अनेक शेतकरी यंत्र परवडत नसल्याने मजुरांकडून सोंगणी करून घेत आहेत.

कृषी विभागाच्या माहितीनुसार, जिल्ह्यात मागील वर्षीच्या तुलनेत २१ हजार ७९७ हेक्टरने गव्हाचा पेरा कमी झाला. तुलनेत गहू पेरणी क्षेत्र ३१ टक्क्यांनी कमी झाला. त्यामुळे शिवारातील गहू पिकाची सोंगणी झाल्यानंतर त्यापासून जनावरांना चारा म्हणून भुसा मिळवण्यासाठी शेतकरी प्रयत्नशील आहेत. प्रामुख्याने अनेक शेतकरी धान्य व जनावरांसाठी भुस्सा मिळेल या उद्देशाने गहू पेरणी करतात. मात्र पाण्याचा प्रश्न गंभीर वळणावर असल्याने शेतकऱ्यांनी यंदा गहू पेरणी टाळली.

पूर्वी मजूर किंवा कुटुंबातील सदस्यांकडून गहू सोंगणी केल्यानंतर मळणी यंत्राद्वारे त्याची काढणी व्हायची. मात्र गेल्या २० वर्षांत हार्वेस्टरचा वापर वाढला. पूर्वी फक्त गहू शेतकऱ्यांना मिळायचा तर भुसा मिळत नसायचा. अलीकडे गहू काढण्यासह भुसा संकलित करणारे हार्वेस्टर यंत्र उपलब्ध आहे. मात्र पारंपरिक उपलब्ध यंत्राची मजुरी एकरी २५०० रुपये तर सुधारित गहू व भुस्सा देणाऱ्या यंत्राची मजुरी ५ हजार रुपये आहे. दुप्पट मजुरी असल्याने काही शेतकरी मजुरांकडूनच सोंगणीला पसंती देत आहेत.