Solapur News : पुणे जिल्ह्यातील धरणांमधून उजनी धरणात दहा टीएमसी पाणी सोडावे, या मागणीसाठी युवा सेनेने जिल्हाप्रमुख गणेश इंगळे व सचिन बागल, युवासेना जिल्हा समन्वयक किशोर देशमुख यांच्या नेतृत्वाखाली सोमवारी (ता. २९) शिराळ (टें) येथे रास्ता रोको आंदोलन करण्यात आले. या वेळी माढ्याचे तहसीलदार विनोद रणवरे व टेंभुर्णी पोलिस ठाण्याचे पोलिस निरीक्षक दीपक पाटील यांनी निवेदन स्वीकारले.

सध्या उजनी धरण हे उणे पातळीमध्ये गेले असून, उजनी धरणावर अवलंबून असणारी शेती तसेच सोलापूर, पुणे, नगर जिल्ह्यांतील कर्जत, जामखेड, धाराशिव, सोलापूर, इंदापूर, बारामती शहरांसह सोलापूर जिल्ह्यातील शंभरहून अधिक ग्रामपंचायती व नगरपालिकांचा पाणीपुरवठा उजनी धरणावर अवलंबून आहे.

त्याप्रमाणे सोलापूर व पुणे जिल्ह्यांतील औद्योगिक वसाहतींना उजनी धरणातून पाणीपुरवठा होतो. या सर्व योजनांना पाणीटंचाईची झळ बसण्याची शक्यता आहे. जनावरांच्या चाऱ्यांचा प्रश्‍नही गंभीर होऊ शकतो. त्यामुळे धरणाच्या वरच्या बाजूला असणाऱ्या भामा आसखेड, कळमोडी व इतर धरणांतून उजनी धरणात दहा टीएमसी पाणी सोडण्यात यावे, अशी मागणी युवा सेनेच्या वतीने करण्यात आली.

पाणी सोडले नाही, तर यापेक्षा उग्र आंदोलन करण्यात येईल, असा इशाराही युवा सेनेच्या वतीने देण्यात आला. या वेळी गणेश इंगळे, सचिन बागल, किशोर देशमुख, महादेव बंडगर, सुरेश लोंढे यांनी मनोगत व्यक्त केले.

‘तेव्हा सोडले, आताही सोडा’

तत्कालीन माजी उपमुख्यमंत्री विजयसिंह मोहिते पाटील यांनी वीस वर्षांपूर्वी पुणे जिल्ह्यातील सर्व धरणांमधून उजनीमध्ये दहा टीएमसी पाणी सोडले होते. त्यामुळे उपमुख्यमंत्री अजित पवार यांनीही पाणी सोडावे, तसेच पालकमंत्री चंद्रकांत पाटील यांच्याकडे सोलापूर जिल्ह्यातील आमदार व खासदारांनी त्यासाठी आग्रह धरावा, अशी मागणीही या वेळी इंगळे यांनी केली.