Latur News : तालुक्यातील साठवण व लघु पाझर तलावातील उपलब्ध पाणीसाठा संपुष्टात येत आहे. सध्या पाच तलाव कोरडेठाक पडले आहेत. तीन तलावात अल्प जिवंत पाणीसाठा उपलब्ध आहे. त्यामुळे पुढील काळात पाणी टंचाईची स्थिती बिकट होणार आहे. यासंदर्भात उपविभागीय अधिकाऱ्यांनी बैठकीत आढावा घेतला आहे.

अहमदपूर तालुक्यात एकूण २८ साठवण व लघुपाझर तलाव आहेत. या तलावातील पाणीसाठ्याचा वापर काही गावांतील पाणीपुरवठा, सिंचन व्यवस्थेसह गुराढोरांसाठी होतो. तालुक्यात यावर्षी अत्यंत कमी प्रमाणात पाऊस काळ झाल्याने सुरवातीपासूनच साठवण व लघुपाझर तलाव संपूर्णपणे भरले नाहीत. तालुक्यातील मोघा व भुतेकरवाडी हे दोन लघु पाझर तर सावरगाव थोट, हागदळ - गुगदळ, येलदरी हे तीन साठवण असे एकूण पाच तलाव कोरडेठाक पडले आहेत.

तालुक्यातील थोडगा, धसवाडी, सोनखेड, गोताळा, वाकी, तेलगाव हे सहा लघु पाझर तलाव तर तांबट सांगवी, मावलगाव, खंडाळी, नागझरी, अंधोरी, ढाळेगाव, येस्तार, मोळवण, कावळवाडी, हंगेवाडी, कोपरा, उगलेवाडी, अहमदपूर, थोडगा हे १४ साठवण तलावातील उपयुक्त पाणीसाठा हा शून्य टक्क्यावर आलेला आहे.

पाटोदा ७.१४ टक्के, काळेगाव ४. ९६ टक्के तर नागठाणा तलावात ६.२३ टक्के एवढा जिवंत पाणीसाठा उपलब्ध आहे. तालुक्यातील साठवण व लघुपाझर तलावातील सध्याची पाण्याची परिस्थिती पाहता येणाऱ्या काळात मोठ्या अडचणी निर्माण होण्याची शक्यता आहे.