Ahilyanagar News : सध्या अस्तित्वात असलेले पाण्याचे स्रोत व प्रकल्पातील पाणीसाठा याला काही मर्यादा असल्याने जल स्वयंपूर्ण होण्यासाठी प्रत्येक गावातील शेतकऱ्यांनी आपल्या शेतात जलसंधारणाची कामे करून पाण्याची उपलब्धता वाढविणे आणि उपलब्ध पाण्याचा काटकसरीने वापर करून पाण्याची उत्पादकता वाढविण्याची गरज असल्याचे मत जलमित्र सुखदेव फुलारी यांनी व्यक्त केले.

नेवासा तालुक्यातील पाथरवाला येथील माध्यमिक विद्यालयात शनिवारी (ता. २२) जागतिक जल दिनामित्त कार्यक्रम झाला. जलजागृती सप्ताहात शालेय जलसाक्षरता, पाण्याची बचत व संवर्धन काळाची गरज याविषयावर सुखदेव फुलारी यांचे भाषण झाले. उपविभागीय अभियंता संदीप पवार कार्यक्रमाच्या अध्यक्षस्थानी होते. माजी सरपंच दत्तात्रय खाटीक, मुख्याध्यापक रमेश खाटीक, सरपंच हरिभाऊ थोरे उपस्थित होते.

श्री. फुलारी म्हणाले, उपलब्ध पाणीसाठा किती आहे आणि पीक, माणूस, पशू-पक्षी यातील कोणत्या घटकासाठी नेमके किती पाणी लागते याची माहिती असेल तर पाण्याचे योग्य नियोजन करणे सोपे होते.

पारंपारिक प्रवाही सिंचन पद्धतीत बदल करून सूक्ष्मसिंचनाचा अवलंब केल्यास ४० टक्के पाण्याची बचत होते. प्रकल्पातील पाणी शेतीला देणे आणि त्याचे सिंचन व्यवस्थापन करणेसाठी महाराष्ट्र सिंचन पद्धती शेतकरी व्यवस्थापन कायदा २००५ अस्तित्वात येऊन पाणी वापर संस्था स्थापन झाल्या.

सिंचन व्यवस्थापनात शेतकऱ्यांचा सहभाग वाढवणे,पाणी व्यवस्थापनात सुधारणा करणे,सिंचन योजना प्रभावीपणे राबवणे,पाणी वापराची कार्यक्षमता वाढवणे हा यामागील उद्देश आहे.पाणी व्यवस्थापनात सुधारणा करण्यासाठी शेतकऱ्यांकडून थेट सहभाग मिळतो.

सिंचन योजना प्रभावीपणे राबवण्यासाठी मदत होते. शेतकऱ्यांना पाणी हक्कदारी व पीक स्वातंत्र्य मिळते. प्रारंभी विद्यालयातील विद्यार्थी-विद्यार्थिनी, पाटबंधारे विभागाचे अधिकारी, शेतकरी व ग्रामस्थांनी पाणी आडवा-पाणी जिरवा, पाण्याची बचत-काळाची गरज, ‘जल है तो कल है’ या घोषणा देत गावामधून जलजागृती फेरी काढली.