Water Crisis Management : जलसंकट निवारणासाठी सर्वांची एकजूट महत्त्वाची

Chh. Sambhajinagar News : शासनाच्या विविध योजना आणि उपाययोजनांद्वारे मराठवाड्यावरील जलसंकट दूर करण्यासाठी आपण प्रयत्न करीत आहोत. या प्रयत्नांमध्ये सगळ्यांचा सहयोग आवश्यक आहे, असे मत पाणीपुरवठा व स्वच्छता राज्यमंत्री मेघना साकोरे बोर्डीकर यांनी व्यक्त केले.

जागतिक जल दिनानिमित्त रविवारी (ता. 23) शहरात वॉकेथॉनचे आयोजन करण्यात आले होते. विभागीय क्रीडा संकुल येथून सुरवात होऊन संत गजानन महाराज मंदिरापर्यंत जाऊन पुन्हा क्रीडा संकुल येथे समारोप करण्यात आला. या वॉकेथॉनला नागरिकांचा उत्स्फूर्त प्रतिसाद लाभला.

त्याच्या समारोप प्रसंगी राज्यमंत्री मेघना साकोरे बोर्डीकर बोलत होत्या.कार्यक्रमास, जिल्हाधिकारी दिलीप स्वामी, अपर जिल्हाधिकारी प्रवीण फुलारी, निवासी उपजिल्हाधिकारी विनोद खिरोळकर, उपजिल्हाधिकारी उमाकांत पारधी, उपमुख्य कार्यकारी अधिकारी राजेंद्र देसले, वन अधिकारी कीर्ती जमदाडे,

जिल्हा क्रीडा अधिकारी संभाजी देसाई, जिल्हा नियोजन अधिकारी भारत वायाळ, जिल्हा अधीक्षक कृषी अधिकारी प्रकाश देशमुख, स्टरलाईट चे मिलिंद पाटील, दिलीपसिंग बयाज, जिल्हा समन्वयक किरण बिलोरे यांसह विविध विभागांचे अधिकारी, सामाजिक संस्था आणि नागरिक मोठ्या संख्येने उपस्थित होते.

राज्यमंत्री मेघना साकोरे बोर्डीकर म्हणाल्या, की मराठवाड्याच्या जलसमृद्धीसाठी शासन विविध उपक्रम राबवत आहे. त्याला सर्व संस्थांचा उत्तम प्रतिसाद मिळत आहे. जलसंकट दूर करण्यासाठी सर्वांनी एकत्र येऊन प्रयत्न करावेत, असे आवाहनही त्यांनी केले. कार्यक्रमाचे प्रास्ताविक दिलीपसिंग बयाज यांनी केले.