Solapur News : तालुक्यात परतीच्या पावसाने सर्वत्र हजेरी लावली आहे. रब्बी हंगामातील ज्वारीची पेर ३३ टक्के झाली असून, गहू व हरभरा पेरणीसाठी अनुकूल हवामान नाही. पेरणीसाठी थंडीची आवश्‍यकता असून, शेतकरी थंडी पडण्याच्या प्रतीक्षेत आहेत.

माळशिरस तालुक्याचा काही भाग वगळता सर्वत्र समाधानकारक पाऊस झाला आहे. वेळोवेळी पडलेल्या समाधानकारक पावसामुळे कांदा व मका पीक जोमात आल्याने व भाव चांगला मिळाल्याने शेतकरी वर्ग समाधानी असून, आता रब्बी पेरणीच्या तयारीला लागला आहे.

तालुक्यात रब्बी ज्वारीचे सरासरी क्षेत्र पाच हजार ७३६ हेक्टर असून, आजअखेर एक हजार ९३९ हेक्टर क्षेत्रावर ज्वारीची पेर झाली आहे.

मका पिकाचे सरासरी क्षेत्र ११ हजार २८३ असून पेरणी तीन हजार ६७२ हेक्टर झाली आहे. गहू पिकाचे सरासरी क्षेत्र चार हजार ६२६ हेक्टर असून अद्याप गहू पिकाची पेर झाली नाही.

त्याचबरोबर हरभरा पिकाचे क्षेत्र दोन हजार १९१ असून केवळ ६५ हेक्टर पेर झाली असून, शेतकरी अनुकूल हवामानाच्या प्रतीक्षेत आहेत. तर समाधानकारक पाऊस झाल्यामुळे ऊस लागवड करण्याच्या तयारीत शेतकरी आहेत.