Nashik News : येथील वसाका साखर कारखान्याची विक्री न होऊ देता कामगार व ऊस उत्पादकांचे हित लक्षात घेऊन आगामी काळात सदर कारखाना भाडे करारानेच चालविण्यात येईल, असा महत्त्वपूर्ण निर्णय बुधवारी (ता. ४) मुंबईत उपमुख्यमंत्री अजित पवार यांच्या दालनात झालेल्या बैठकित घेण्यात आला, अशी माहिती आमदार डॉ. राहुल आहेर यांनी दिली.

कळवण, देवळा, सटाणा, मालेगाव, चांदवड या तालुक्यांचे कार्यक्षेत्र असलेल्या विठेवाडी (ता. देवळा) येथील वसंतदादा सहकारी साखर कारखान्याचे पुनर्वसन करण्यासाठी शासन सकारात्मक आहे, अशी उपमुख्यमंत्री पवार यांनी दिले. गेल्या दहा वर्षांपासून कारखाना बंद आहे.

कामगार व सभासदांच्या हितासाठी कारखाना पुन्हा सुरू करावा या संदर्भात चर्चा करण्यासाठी चांदवडचे आमदार राहुल आहेर यांच्या नेतृत्वाखालील वसाका कर्मचारी युनियनच्या सदस्यांनी मंत्रालयात उपमुख्यमंत्री पवार यांची भेट घेऊन चर्चा केली. सहकार मंत्री दिलीप वळसे पाटील, हसन मुश्रीफ, शिखर बँकेचे अधिकारी उपस्थित होते.

उपमुख्यमंत्री पवार म्हणाले, की या कारखान्याला ऊर्जितावस्थेत आणण्यासाठी कार्यक्षेत्रात उसाचे क्षेत्र वाढवून को-जनरेशन ही सुरू करावे.कारखाना पुन्हा सुरू झाल्यास शेतकऱ्यांसह कर्मचाऱ्यांच्या रोजीरोटीचा प्रश्‍न निकाली निघणार आहे. शेतकऱ्यांच्या मालकीचा कारखाना म्हणून तो पुढे चालवण्यासाठी सांघिक प्रयत्न व्हावेत.

राज्यातील जिल्हा मध्यवर्ती सहकारी बँकांच्या माध्यमातून शेतकऱ्यांना पीककर्जाचा पुरवठा करणाऱ्या विकास सेवा संस्थांना आर्थिकदृष्ट्या सक्षम करण्यासाठी शासनाचे प्रयत्न सुरू आहेत. हा कारखाना पुन्हा सुरू झाल्यास शेतकऱ्यांसह कारखान्यातील कर्मचाऱ्यांच्या नोकरीचा प्रश्‍न निकाली निघणार आहे. हा शेतकऱ्यांचा कारखाना म्हणून पुढे चालवण्यासाठी प्रयत्न करण्यात यावा.

बैठकीस आमदार राहुल आहेर, शिखर बँकेचे अधिकारी विद्याधर अनासकर, राष्ट्रवादी काँग्रेसचे देवळा तालुकाध्यक्ष पंडित निकम, वसाका कामगार युनियन यांचे विलास देवरे, सुनील देवरे, हिरामण बिरारी, विलास सोनवणे, आनंदा देवरे, रवींद्र सावरकर, नंदू माधव, सतीश शिरोडे, नाना देवरे, आदींसह सहकार व वित्त विभागाचे अधिकारी उपस्थित होते.