Pune News : भूमी अभिलेखविषयक केंद्र व राज्याच्या महत्त्वाकांक्षी प्रकल्पांवर मोलाची कामगिरी करीत असलेल्या भूमी अभिलेख संचालनालयाला गेल्या दोन महिन्यांपासून संचालक मिळालेला नाही.

महसूल विभागाच्या अखत्यारित असलेल्या व पुण्यात मुख्यालय असलेल्या या संचालनालयाचे नेतृत्व ज्येष्ठ सनदी अधिकाऱ्यांकडे दिले जाते. ‘जमाबंदी आयुक्त व भूमी अभिलेख संचालक’ अशा संयुक्त नावाने ओळख असलेल्या या पदावर यापूर्वी एस. चोक्कलिंगम यांनी २०२१ पर्यंत उत्तम पद्धतीने काम केले होते.

चोक्कलिंगम यांची बदली यशदाच्या महासंचालकपदी झाल्यानंतर नि. कु. संधाशू यांनी संचालक पदाची सूत्रे हाती घेतली. त्यांनी डिजिटल स्वाक्षरीत सातबारा, आपली चावडी, ई-हक्क प्रणाली, पीक पाहणी असे प्रकल्प नेटाने पुढे नेले. फेब्रुवारी २०२४ मध्ये त्यांची बदली यशदाचे महासंचालक म्हणून केली गेली.

सूत्रांच्या म्हणण्यानुसार, श्री. सुधांशू यांची बदली झाल्यापासून संचालनालयाच्या कामातील आधीची गती नाहीशी झाली. नवे संचालक सच्चिंद्र प्रतापसिंह यांना स्थिर होऊ देण्यापूर्वीच बदलण्यात आले. ऑक्टोबर २०२४ मध्ये श्री. सिंह यांची बदली करण्यात आली. मात्र या पदावर पूर्णवेळ संचालक का देण्यात आला नाही, याचे कोडे अधिकाऱ्यांना सुटलेले नाही.

भूमी अभिलेख संचालनालयाकडून केंद्र व राज्याशी संबंधित प्रकल्प हाताळले जात आहेत. संचालनालय वाऱ्यावर राहू नये यासाठी सुधांशू यांनाच तात्पुरते संचालक म्हणून काम बघण्यास सांगितले आहे. त्यामुळे यशदाच्या जबाबदारीतून वेळ काढून हे काम रेटत आहेत. दोन्ही पदांमुळे त्यांची कोंडी होत असल्याचे अधिकाऱ्यांचे म्हणणे आहे.

एका वरिष्ठ अधिकाऱ्याने सांगितले, की भूमी अभिलेख संचालनालयाकडून दिशादायक प्रकल्प हाताळले जात आहेत. पीकपाहणी, जमीन मालमत्ताविषयक कामकाज चालविणाऱ्या यंत्रणेचे संचालकपद अंधातरी ठेवणे शोभादायक नाही. पुन्हा या पदावर नियुक्त केल्यास कामकाजाला गती येऊ शकते.